Amérika hökümti “Alma” shirkitining Uyghur diyaridiki mejburiy emgekke chétilidighanliqini alahide tekitlidi

Xitay hökümitining Uyghur diyaridiki mejburiy emgek qilmishi tüpeylidin bu rayondiki köpligen teminat zenjiri hemde buninggha chétishliq gherp shirketliri tégishlik tedbirlerni alghan idi. 8-Iyun küni amérika dölet mejlisige qarashliq xitay ishliri ijra'iye komitétining re'isliridin jéf mérkléy we jéymis mekgawrén birleshme bayanat élan qilip, “Alma” shirkitining mejburiy emgekke chétishliq ikenlikini alahide tekitlidi.

“Alma” shirkitige ewetilgen bu bayanatta ular shirketning bash ijra'iye emeldari tim kokqa bu mesile toghrisida ‍öz qarashlirini ipadiligen. Shundaqla “Alma” shirkitining “Xitaydiki teminat zenjirimizning Uyghurlarni mejburiy emgekke sélish bilen héchqandaq alaqisi yoq” dégen bayanatining toghra emeslikini bildürgen. Bayanatta bu heqte éniq qilip: “Qolimizdiki ispatlar shirkitinglarning Uyghurlarni mejburiy emgekke sélish bilen chétishliq ikenlikini körsetmekte. Shuning üchün silerning shinjang rayonidiki xitay teminatchiliringlarni bikar qilishqa dewet qilimiz” déyilgen. Shundaqla “Alma” shirkitini amérika tamozhna we chégra mudapiye idarisi bilen zich hemkarliship, Uyghur mejburiy emgikige chétishliq mehsulatlarning amérika bazirigha kirishining aldini élishqa chaqirghan.

Mezkur komitétning tor bétide 8-iyun élan qilin'ghan bayanatta éytilishiche, awazgha qoyulush aldida turghan “Uyghur mejburiy emgikini cheklesh qanuni” bu xildiki Uyghur mejburiy emgikige chétishliq herqandaq mehsulatning amérika bazirigha kirishini men'iy qilidiken.