Америка ташқи ишлар министирлиқиниң юқири дәриҗилик бир дипломати таҗикистанни зиярәт қилған

Мухбиримиз әркин
2020-01-13
Share

Америка ташқи ишлар министирлиқиниң оттура  вә җәнубий асия ишлириға мәсул муавин ярдәмчи министири әлис велс ханим өткән һәптә таҗикистанни зиярәт қилип, таҗикистан-афғанистан чеграсида тәкшүрүш елип барған, шундақла таҗикистан әмәлдарлири билән учришип, өз ара һәмкарлиқ, бихәтәрлик вә ахбарат әркинлики қатарлиқ  мәсилиләрни музакирә қилған. Әлис велсниң таҗикистан зиярити америка ташқи ишлар министири майк помпейониң 5‏ вә 6 ‏-январ күнлири қазақистан һәм өзбекистанға қилидиған зиярити кечиктүрелгәндин кейин елип берилған.

Америка ташқи ишлар министирлиқи  илгири майк помпейониң қазақистанда тохтап андин ташкәнт шәһридә америка билән оттура асиядики 5 җумһурийәтниң "5 пилус 1" йиғиниға қатнишидиғанлиқи, униң бу җәрянда уйғур мәсилисини оттуриға қойидиғанлиқини билдүргән. Лекин, помпейониң зиярити оттура шәрқ вәзийити сәвәблик  кечиктүрүлгән . Униң зиярәт пилани хитайни қаттиқ биарам қилғаниди.

"азадлиқ радийоси"ниң хәвәр қилишичә, әлис велсниң таҗикистан зиярити 6- вә 7 ‏-январ күнлири елип берилған. У зияритиниң ахирқи күни дүшәнбидә ахбарат йиғини өткүзүп, оттура асия дөләтлирини иқтисади пурсәтләрни кеңәйтиш, бихәтәрлик җәһәтләрдики һәмкарлиқни күчәйтишкә үндигән. Униң зияритидә уйғур мәсилисини оттура-қойған яки қоймиғанлиқи мәлум әмәс. Лекин у ахбарат йиғинида, ахбарат әркинликиниң муһимлиқини тәкитлигән. Әлис вәллс: "биз ахбарат мустәқиллиқи һәрқандақ бир дөләтниң тәрәққиятида муһим рол ойнайдиғанлиқиға ишинимиз" дегән.

Әлис велс бу зияритидә йәнә таҗикистанниң афған чеграсидики пәнҗи чегра қаравулханисини зиярәт қилған. У "азадлиқ радийо"сиға бәргән баянатида, американиң таҗикистанға 200 милйон доллар бихәтәрлик ярдими бәргәнликини билдүрүп, американиң афғанистанни район яки дунядики террорлуқниң базиси қилип қоллинишқа йол қоймайдиғанклиқини тәкитлигән. Әлис велс бу сәпиридә таҗикистанниң ташқи ишлар, дөләт мудапиә, дөләт бихәтәрлики, ички ишлар  министирлири билән сөһбәт  елип барған, шундақла иҗтимаий тәшкилатларниң вәкиллири билән учрашқан.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт