Amérika tashqi ishlar ministirliqining yuqiri derijilik bir diplomati tajikistanni ziyaret qilghan

Muxbirimiz erkin
2020.01.13

Amérika tashqi ishlar ministirliqining ottura  we jenubiy asiya ishlirigha mes'ul mu'awin yardemchi ministiri elis wéls xanim ötken hepte tajikistanni ziyaret qilip, tajikistan-afghanistan chégrasida tekshürüsh élip barghan, shundaqla tajikistan emeldarliri bilen uchriship, öz ara hemkarliq, bixeterlik we axbarat erkinliki qatarliq  mesililerni muzakire qilghan. Elis wélsning tajikistan ziyariti amérika tashqi ishlar ministiri mayk pompéyoning 5‏ we 6 ‏-yanwar künliri qazaqistan hem özbékistan'gha qilidighan ziyariti kéchiktürélgendin kéyin élip bérilghan.

Amérika tashqi ishlar ministirliqi  ilgiri mayk pompéyoning qazaqistanda toxtap andin tashkent shehride amérika bilen ottura asiyadiki 5 jumhuriyetning “5 Pilus 1” yighinigha qatnishidighanliqi, uning bu jeryanda Uyghur mesilisini otturigha qoyidighanliqini bildürgen. Lékin, pompéyoning ziyariti ottura sherq weziyiti seweblik  kéchiktürülgen . Uning ziyaret pilani xitayni qattiq bi'aram qilghanidi.

“Azadliq radiyosi”ning xewer qilishiche, elis wélsning tajikistan ziyariti 6- we 7 ‏-yanwar künliri élip bérilghan. U ziyaritining axirqi küni düshenbide axbarat yighini ötküzüp, ottura asiya döletlirini iqtisadi pursetlerni kéngeytish, bixeterlik jehetlerdiki hemkarliqni kücheytishke ündigen. Uning ziyaritide Uyghur mesilisini ottura-qoyghan yaki qoymighanliqi melum emes. Lékin u axbarat yighinida, axbarat erkinlikining muhimliqini tekitligen. Elis wells: “Biz axbarat musteqilliqi herqandaq bir döletning tereqqiyatida muhim rol oynaydighanliqigha ishinimiz” dégen.

Elis wéls bu ziyaritide yene tajikistanning afghan chégrasidiki penji chégra qarawulxanisini ziyaret qilghan. U “Azadliq radiyo”sigha bergen bayanatida, amérikaning tajikistan'gha 200 milyon dollar bixeterlik yardimi bergenlikini bildürüp, amérikaning afghanistanni rayon yaki dunyadiki térrorluqning bazisi qilip qollinishqa yol qoymaydighankliqini tekitligen. Elis wéls bu sepiride tajikistanning tashqi ishlar, dölet mudapi'e, dölet bixeterliki, ichki ishlar  ministirliri bilen söhbet  élip barghan, shundaqla ijtima'iy teshkilatlarning wekilliri bilen uchrashqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.