Американиң хитайдики баш әлчиси тик-токниң чәклинишини әйиблигән хитайға инкас билдүргән

Вашингтондин мухбиримиз җәвлан тәйярлиди
2024.03.15

 Американиң тик токқа чәклимә қоюши дәсләпки қәдәмдә әмәлгә ашқандин кейин, американиң хитайда турушлуқ баш әлчиси никулас бурнс (Nicholas Burns) хитай һөкүмитиниң американиң тик токни чәклимәкчи болғиниға қарши турғиниға инкас қайтурған.

Никулас бурнис 14-март “бломберг телевизийәси” ниң зияритини қобул қилип, хитайниң тик-токниң америкада чәклинишигә қарши турушиниң бимәнилик икәнликини, хитайниң америка таратқулиридики әркинлик вә кәң имканийәттин пайдилинип америкаға қарши гәп қилалиғини билән, хитайниң ичидә американиң иҗтимаий алақә әплирини ишлитишни чәкләйдиғанлиқини билдүргән. У мундақ дегән: “бу һәптә америкада тик токни чәкләш һәққидә гәп болғандин кейин, биз бейҗиңдин чиқиватқан нурғун әйибләшләрни аңлидуқ. Бу наһайити күлкилик бир иштур. Чүнки хитай әмәлдарлири X дин пайдилинип американи тәнқидлийәләйду. Әмма улар өз пуқралирини X, фесбок, инстаграм, гугил торини ишлитиштин чәкләйду” .

Никулас бурнис йәнә сөзидә, америка билән хитай оттурисидики асаслиқ риқабәтниң техника, йәни тик-токқа охшаш алақә васитилиридә қоллинилидиған сода техникиси икәнликини, хитайниң буларни америкаға қарши һәрбий риқабәттә қоллинидиғанлиқини билдүргән. У байден һөкүмитиниң бу җәһәттики мәйданиниң наһайити ениқ икәнликини, хитайға американиң техникилирини експорт қилмайдиғанлиқини, чүнки буниң американиң хәвпсизликигә зиян йәткүзидиғанлиқини ейтқан.

-13Март күни, тик-токни чәкләш һәққидики қанун лайиһәси 65 кә қарши 352 аваз билән авам палатасида толуқ мақуллуқтин өткәндин кейин, хитай һөкүмитиниң буниңдин биарам болуп, американи әйибләшкә өткәнлики мәлум. Һалбуки, хитай абонтлири йәнила тик-токниң хитайдики вариянти болған дойинни ишлитиватқан болуп, буниң америкаға қандақ тәсир көрситидиғанлиқи һазирчә намәлум икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.