Amérikaning xitaydiki bash elchisi tik-tokning cheklinishini eyibligen xitaygha inkas bildürgen

 Amérikaning tik tokqa cheklime qoyushi deslepki qedemde emelge ashqandin kéyin, amérikaning xitayda turushluq bash elchisi nikulas burns (Nicholas Burns) xitay hökümitining amérikaning tik tokni cheklimekchi bolghinigha qarshi turghinigha inkas qayturghan.

Nikulas burnis 14-mart “Blombérg téléwiziyesi” ning ziyaritini qobul qilip, xitayning tik-tokning amérikada cheklinishige qarshi turushining bimenilik ikenlikini, xitayning amérika taratquliridiki erkinlik we keng imkaniyettin paydilinip amérikagha qarshi gep qilalighini bilen, xitayning ichide amérikaning ijtima'iy alaqe eplirini ishlitishni chekleydighanliqini bildürgen. U mundaq dégen: “Bu hepte amérikada tik tokni cheklesh heqqide gep bolghandin kéyin, biz béyjingdin chiqiwatqan nurghun eyibleshlerni angliduq. Bu nahayiti külkilik bir ishtur. Chünki xitay emeldarliri X din paydilinip amérikani tenqidliyeleydu. Emma ular öz puqralirini X, fésbok, instagram, gugil torini ishlitishtin chekleydu” .

Nikulas burnis yene sözide, amérika bilen xitay otturisidiki asasliq riqabetning téxnika, yeni tik-tokqa oxshash alaqe wasitiliride qollinilidighan soda téxnikisi ikenlikini, xitayning bularni amérikagha qarshi herbiy riqabette qollinidighanliqini bildürgen. U baydén hökümitining bu jehettiki meydanining nahayiti éniq ikenlikini, xitaygha amérikaning téxnikilirini éksport qilmaydighanliqini, chünki buning amérikaning xewpsizlikige ziyan yetküzidighanliqini éytqan.

-13Mart küni, tik-tokni cheklesh heqqidiki qanun layihesi 65 ke qarshi 352 awaz bilen awam palatasida toluq maqulluqtin ötkendin kéyin, xitay hökümitining buningdin bi'aram bolup, amérikani eyibleshke ötkenliki melum. Halbuki, xitay abontliri yenila tik-tokning xitaydiki wariyanti bolghan doyinni ishlitiwatqan bolup, buning amérikagha qandaq tesir körsitidighanliqi hazirche namelum iken.