Америка б д т да шималий корейәни қанат астиға алған хитай билән русийәни әйиблиди

11-Айниң 4-күни америка һөкүмити бирләшкән дөләтләр тәшкилати (б д т) хәвпсизлик кеңиши йиғинида хитай билән русийәниң шималий корейәни қанат астиға еливатқанлиқини әйиблигән һәмдә шималий корейәгә техиму қаттиқ җаза чәклимиси қоюшни тәшәббус қилған.

“руйтерс агентлиқи” ниң бу һәқтә бәргән хәвиридә ейтилишичә, б д т хәвпсизлик кеңишиниң әзаси болған хитай билән русийә шималий корейәниң хәтәрлик қоралларни тәрәққий қилдурушиға көз юмған һәмдә б д т хәвпсизлик кеңишиниң шималий корейәгә чарә қоллинишиға тосқунлуқ қилған. Американиң б д т да турушлуқ муавин әлчиси роберт вуд (Robert Wood) мундақ дегән: “русийә билән хитай шималий корейәниң қилмишлирини әйибләш вә униңдин һесаб елишқа номуссизларчә тосқунлуқ қиливатиду. Москва билән бейҗиңниң шималий корейәниң һәддидин ашқан һәрикәтлирини тәкшүрүшкә тосқунлуқ қилиши түпәйлидин, улар башқурулидиған бомба, ядро қораллири қатарлиқ кәң көләмлик қирғучи қоралларни бималал тәрәққий қилдурмақта”.

Роберт вудниң билдүрүшичә, шималий корейә 31-өктәбир күни қитәләр ара башқурулидиған бомба қоюп бәргәндин кейин, б д т хәвпсизлик кеңишигә әза 15 дөләт йиғин чақирип бирләшмә баянат елан қилмақчи болған, әмма русийә билән хитай бу баянатни елан қилишқа тосқунлуқ қилған.

Хәвәрдә ейтилишичә, б д т хәвпсизлик кеңиши 2006-йилдин башлап шималий корейәниң ядро қорал вә башқурулидиған бомбини тәрәққий қилдуруш қилмишини чәкләп кәлгән болсиму, шималий корейә америкаға охшаш “дүшмән дөләтләр” ниң тәһдитигә тақабил туруш үчүн ядро қоралларни тәрәққий қилдурушқа мәҗбур икәнликини дәва қилип кәлгән. Русийә билән хитай болса шималий корейәниң бу тәлипини һәқлиқ дәп қариған һәмдә америка, фирансийә, японийә, җәнубий корейә қатарлиқ дөләтләрниң шималий корейәни “зиядә қорқунчлуқ дөләт” дәп чәклишигә йол қоймайдиғанлиқини билдүргән.