Amérikaning yéngi bashqurulidighan bombisi jenubiy déngizdiki küchler tengpungluqini buzup tashlaydiken

Amérika déngiz armiyesi hindi-tinch okyan'gha orunlashturghan yéngi tiptiki yiraq musapilik bashqurulidighan bombisi xitayning hawadin oq étish jehettiki üstünlükini bitchit qilalaydiken.

“Ruytérs agéntliqi” 14-awghust bergen bu xewerge qarighanda, amérikaning réytiyon shirkiti (Raytheon) tetqiq qilip yasap chiqqan bu bashqurulidighan bombining hawa hujumigha qarshi mudapi'e iqtidarimu bar iken. Amérika uni hindi-tinch okyan rayonidiki jiddiy weziyetni peseytish üchün orunlashturghan bolup, tarixtin buyan amérika orunlashturghan eng uzun yiraq musapilik bashqurulidighan bomba hésablinidiken.

AIM-174B Tipliq bu bashqurulidighan bomba 400 kilométir yiraqliqtiki nishan'gha yétidighan bolup, amérikaning ilgiriki AIM 120 AMRAAM tipliq bashqurulidighan bombisi yételeydighan 150 kilométirliq nishandin xélila yuqiri iken hemde xitayning PL-15 tipliq bashqurulidighan bombisidin éship chüshidiken. Bu bashqurulidighan bombini amérikaning hem awstraliyening bombardimanchi ayropilanliri tengla ishliteleydiken, shundaqla bu ayropilanlar awiyamatkidin yiraqlashqan halettimu xitayning halqiliq nishanlirigha zerbe béreleydiken.

Teywenlik herbiy mutexessislerning bildürüshiche, amérikaning bu bashqurulidighan bombisi xitayning jenubiy déngizdiki ighwagerliki we teywen boghuzidiki tehditini azaytalaydiken. Chünki ilgiri xitayning körünmes ayropilanliri bilen 250 kilométir nishan'gha yétidighan PL-15 tipliq bashqurulidighan bombisi amérikagha xiris élip kelgen bolsa, xitay üchün teywen'ge hujum qilish ishenchini élip kelgen iken.