Amérika xelq'ara diniy erkinlik yighinida taylandtiki Uyghurlar mesilisige köngül bölüshke chaqirildi

3-Féwral küni, amérika dölet mejlisidiki échilish murasimi bilen bashlinip 4-féwral künimu dawamlishiwatqan amérikaning xelq'ara diniy erkinlik alahide yumilaq üstel yighinida, her qaysi döletler taylandtiki Uyghur musapirlirigha köngül bölüshke chaqirilghan. Amérika Uyghur birleshmisining bildürüshiche, yighinda doklat bergen zhurnalist we tetqiqatchi nirola elima (Nyrola Elima) 11 yildin artuq waqittin béri taylandta tutup turuluwatqan Uyghur musapirlirining mesilisini küntertipke qoyup, b d t ni “Ulargha musapirliq salahiyiti bérishke” chaqirghan. Nirola elima yene her qaysi döletlerni konkrét heriketke kélip, Uyghur musapirlirini téz arida bixeter jaygha orunlashturushqa chaqirghan. Nirola elimaning ötken yili amérikaliq zhurnalist bén ma'uk bilen birliship “Nyu-york waqti” gézitide élan qilghan Uyghurlarning tayland arqiliq chet elge qéchishi témisidiki “Xitaydin jesurluq bilen qéchip qutulush: awarichilikning bashlinishi” mawzuluq tekshürüsh doklati zor tesir qozghighanidi.

Melum bolushiche, bu nöwetlik xelq'ara diniy erkinlik yumilaq üstel alahide yighinigha Uyghurlardin yene amérika Uyghur birleshmisining re'isi elfidar iltebir, Uyghur herikiti teshkilatining re'isi roshen abbas qatarliq pa'aliyetchiler qatnashmaqtiken. Diniy zatlar, siyasiyonlar, hökümet emeldarliri, zhurnalistlar, tetqiqatchi we pa'aliyetchiler qatnashqan bu nöwetlik yighinda dunya miqyasida diniy erkinlikni qoghdash toghriliq intayin muhim muzakirilerning élip bériwatqanliqi qeyt qilinmaqta.

Amérika Uyghur birleshmisining bildürüshiche, yighinda Uyghur pa'aliyetchiler nöwette Uyghur musulmanlirigha qarita dawamlishiwatqan irqiy qirghinchiliq, basturush, milyonlighan kishining mejburiy emgekke sélinishi, lagérlargha qamilishi we diniy erkinlikining qattiq cheklinishige qarshi tedbir élishning jiddiylikini tekitligen. Amérika xelq'ara diniy erkinlik munbirining yighini trampning birinchi qétimliq pirézidéntliq dewride bashlan'ghan.

Bu nöwet dölet mejliside ötküzülgen xelq'ara diniy erkinlik yumilaq üstel yighini trampning bu yil 20-yanwar 2-qétim wezipige olturushining arqisidinla chaqirilghan. Melum bolushiche, bu qétimliq yumilaq üstel yighini halqiliq qanuni nuqtilar we muhim siyasiy tewsiyelerni bérishke merkezlishidiken.