Amérika dölet mejlis ezaliri amérika hökümitidin xitayning jasusluq heriketliri heqqide tepsiliy uchur telep qilghan

Amérika dölet mejlisining bir qisim ezaliri amérika hökümitidin xitay diplomatliri we jasuslirining amérikada élip barghan tesir körsitish we jasusluq pa'aliyetlirining kölimi heqqide özlirige toluq melumat bérishni telep qilghan.

“Xewer heptiliki” zhurnilining mexsus xewiridin qarighanda, aldinqi hepte awam palata ezasi darrél eysa (R-CA) bashchiliqidiki 13 neper mejlis ezasi amérikaning bash teptishi mérrik garland, fédératsiye tekshürüsh idarisi (FBI) ning bashliqi kristofir wray we tashqi ishlar ministiri antoniy bilinkén'gha mexsus mektup yollighan. Ular mektupida “Amérika hökümitining amérikaning asasliq reqibi bolghan xitayning sistémiliq tesir körsitish herikitige yéterlik jawab qayturmaywatqanliqini, xitayning amérikadiki tesir körsitish we jasusluq pa'aliyetlirige da'ir weqelerning toxtimay tekrarliniwatqanliqini” bildürgen.

Jenubiy xitay seher pochtisi gézitining bu heqtiki xewiride déyilishiche, yuqiridiki mejlis ezaliri xétide buninggha nuqtiliq halda ikki misalni körsetken. Uning biri, yéqinda nyu-york ishtatining ishtat bashliqi ketiy xokul (Kathy Hochul) ning qol astida mu'awin ishxana bashliqi bolup ishligen linda sun (Linda Sun) ning jasusluq gumani bilen eyiblinish weqesi iken. Linda sün xitay elchixanisi we uning xadimliri bilen yéqindin hemkarliship, xitay hökümitining wakaletchisi süpitide xizmet qilish bilen eyiblen'genidi.

Yene biri bolsa, xitay dölet re'isi shi jinping ötken yili asiya-tinch okyan iqtisad hemkarliqi APEC bashliqlar yighinigha qatnishish üchün amérikaning san firansisko shehirige kelgende u yerdiki xitay qollighuchilirining amérikadiki démokratiye pa'aliyetchilirige hujum qilishi iken. Dölet mejlis ezaliri “Xitay merkizi birliksep bölümining amérikadiki qollirining xalighanche heriket qiliwatqanliqini” eskertken.

Ular amérika hökümitining yuqirida ismi atalghan emeldarlirigha yollighan mektupida amérika hökümitining bu weqelerge da'ir qandaq tedbirlerni qollan'ghanliqi, bundaq weqelerning qaytilanmasliqigha qandaq kapaletlik qilidighanliqi heqqide özlirige tepsiliy melumat bérishni telep qilghan.