Америка авам палатасида уйғурларға мунасивәтлик бир қанун лайиһәси вә икки қарар лайиһәсиниң мақуллиниши зор алқишқа еришти

Мухбиримиз ирадә
2021-12-09
Share

8-Декабир күни “уйғур мәҗбурий әмгикиниң алдини елиш қанун лайиһәси” америка авам палатасида мутләқ йоқури аваз билән мақуллуқтин өтти. Шуниң билән бир вақитта йәнә, хитай һөкүмитиниң уйғурларға қаритиватқан зулумини ирқий қирғинчилиқ дәп әйибләш вә хәлқара олимпик комитетиниң кишилик һоқуқ вәдисигә әмәл қилмиғанлиқини әйбләш һәққидики икки қарар лайиһәсиму мақулланди.

Америка һөкүмити 6-декабир күни уйғурлар учраватқан ирқий қирғинчилиқ вә инсанийәткә қарши җинайәт сәвәбидин хитай саһибханлиқ қилидиған бейҗиң қишлиқ олимпик мусабиқисини бойқут қилидиғанлиқини елан қилған иди.

Арқидинла америка дөләт мәҗлисидә узундин буян уйғурлар төт көз билән күтүватқан “уйғур мәҗбурий әмгикиниң алдини елиш қанун лайиһәси” вә икки қарар лаһийәсиниң авам палатада авазға қоюлуп биргә қарши 428 аваз билән мувәппәқийәтлик тәстиқтин өтүши зор алқишқа еришти. Уйғурлар буни уйғур мәҗбурий әмгикини аяқлаштуруштики зор бир қәдәм, дәп баһалиди.

Нурғунлиған даңлиқ мәтбуатлар бу һәқтә хәвәр тарқатти. Кишилик һоқуқ органлири болса президент байденни дәрһал бу қанун лайиһәсигә қол қоюп, уни кечиктүрмәй иҗра қилишқа чақирди.

Хитай һөкүмити америка авам палатасиниң бу һәрикитидин қаттиқ нарази болған. Хитайниң авази болған “йәр шари вақти гезити” бу һәқтики инкас мақалисида: “америка аталмиш мәҗбурий әмгәкни баһанә қилип хәлқара әркин тиҗарәткә тосқунлуқ қилди,” дәп әйиблигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт