Amérika awam palatasida Uyghurlargha munasiwetlik bir qanun layihesi we ikki qarar layihesining maqullinishi zor alqishqa érishti

Muxbirimiz irade
2021-12-09
Share

8-Dékabir küni “Uyghur mejburiy emgikining aldini élish qanun layihesi” amérika awam palatasida mutleq yoquri awaz bilen maqulluqtin ötti. Shuning bilen bir waqitta yene, xitay hökümitining Uyghurlargha qaritiwatqan zulumini irqiy qirghinchiliq dep eyiblesh we xelq'ara olimpik komitétining kishilik hoquq wedisige emel qilmighanliqini eyblesh heqqidiki ikki qarar layihesimu maqullandi.

Amérika hökümiti 6-dékabir küni Uyghurlar uchrawatqan irqiy qirghinchiliq we insaniyetke qarshi jinayet sewebidin xitay sahibxanliq qilidighan béyjing qishliq olimpik musabiqisini boyqut qilidighanliqini élan qilghan idi.

Arqidinla amérika dölet mejliside uzundin buyan Uyghurlar töt köz bilen kütüwatqan “Uyghur mejburiy emgikining aldini élish qanun layihesi” we ikki qarar lahiyesining awam palatada awazgha qoyulup birge qarshi 428 awaz bilen muweppeqiyetlik testiqtin ötüshi zor alqishqa érishti. Uyghurlar buni Uyghur mejburiy emgikini ayaqlashturushtiki zor bir qedem, dep bahalidi.

Nurghunlighan dangliq metbu'atlar bu heqte xewer tarqatti. Kishilik hoquq organliri bolsa prézidént baydénni derhal bu qanun layihesige qol qoyup, uni kéchiktürmey ijra qilishqa chaqirdi.

Xitay hökümiti amérika awam palatasining bu herikitidin qattiq narazi bolghan. Xitayning awazi bolghan “Yer shari waqti géziti” bu heqtiki inkas maqalisida: “Amérika atalmish mejburiy emgekni bahane qilip xelq'ara erkin tijaretke tosqunluq qildi,” dep eyibligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet