Amérika filippindiki yene töt herbiy bazida turush heqqide kélishim imzalighan

Muxbirimiz irade
2023.02.02

Amérika filippinda yene töt herbiy bazini qolgha keltürgen. Amérikaning filippindiki 4 herbiy bazigha kirip orunlishishigha imkaniyet béridighan mezkur kélishim amérika mudapi'e ministiri loyd ostinning filippindiki resmiy ziyaritidin kéyin imzalan'ghan.

B b s radiyosining xewer qilishiche, mezkur kélishim intayin muhim bolup, bu, amérikaning jenubiy déngiz, teywen etrapi we xitayni nazaret qilip turushigha imkaniyet yaritidiken.

Xewerde éytilishiche, jenubiy déngizdiki herqandaq bir jiddiy ehwalgha taqabil turush üchün filippin bolmisa bolmaydiken.

Amérikaning hazir filippindiki 5 herbiy bazigha cheklik da'iride kirish hoquqi bar bolup, amérika mudapi'e ministirliqi bu 4 yéngi baza heqqidiki bayanatida: “Bu yéngi herbiy bazilar filippindiki insanperwerlikni qollash we kilimatqa munasiwetlik apetlerni téximu téz birterep qilish hem bashqa ortaq xirislargha birlikte taqabil turush üchün intayin muhim” dégen.

Amérika terep téxi bu yéngi bazilarning qeyerde ikenlikini éytmighan bolsimu, emma u filippinning shimalidiki teywen'ge yéqin birdinbir chong aral bolghan lozunda arilida bolushi mumkinken.

Xitayning filippindiki elchixanisi bolsa kélishimni tenqidlep: “Amérikaning herikiti rayon jiddiylikini kücheytip, rayonning tinchliqi we muqimliqigha buzghunchiliq qilidu” dégen.

B b s ning xewer qilishiche, xitayning yéqinqi yillardin buyan jenubiy déngizdiki herbiy herikitini kücheytip, jenubiy déngiz yaki gherbiy filippin déngizining xeritisini qaytidin sizishqa urunushi filippinni qattiq chöchütken bolsimu emma arilishishqa küchi yetmigen.

Filippin ilgiriki yillarda xitay bilen izchil yaxshi munasiwet qurup kelgen bolsimu, lékin xitayning 2014-yilidin kéyin filippin'gha yéqin jaylarda sün'iy arallarni qurup herbiyleshtürüshi filippinning pozitsiyesini özgertken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.