Amérika herbiy paraxotliri filippin paraxotlirini muhapizet qilishqa wede bergen

“Birleshme agéntliqi” ning 27-awghusttiki xewiride éytilishiche, amérika armiyesi yéqinda jenubiy déngiz teweside xitay déngiz charlash qisimliri bilen toqunushup qalghan filippin béliqchiliq kémilirini muhapizet qilishqa wede bergen.

“Manéla xewerliri” gézitining 27-awghustta bildürüshiche, amérika déngiz armiyesi hindi-tinch okyan rayonining qomandani samyul paparo (Samuel Paparo) bu heqtiki meydanini shu küni chaqirilghan amérika-filippin herbiy söhbitide ipadiligen. “Amérika armiyesi filippin paraxotlirining yémeklik we bashqa xam eshyalarni jenubiy déngizdiki filippin armiyesige toshush ishlirigha yardemlishemdu?” dégen so'algha qarita, admiral samyol “Elwette” dep jawab bergen. Emma filippin armiyesining bash qomandani général roméyo brawnér (Romeo Brawner) bu mesilide filippin asasiy qanunidiki “Chet el küchlirini ichki qisimdiki talash-tartishqa chillap kelmeslik” dégen belgilimini chiqish qilghan halda ish köridighanliqini tekitligen.

Melum bolushiche, yéqinqi aylarda filippin béliqchiliq kémiliri köp qétimlap xitay déngiz charlash qisimliri we xitay déngiz armiyesi bilen toqunushup qalghan. Bu jeryanda filippin terepning paraxotliri éghiz zexmetke uchrash, béliqchilar yarilinish qatarliq ehwallar köp qétim körülgen. Bu xil ré'alliq aldida filippin hökümiti özlirining amérika bilen imzalighan ittipaqdashliq kélishimining mezmunigha bina'en amérika tereptin yardem sorashni jiddiy oylishishqa ötken.

Xitay hökümiti yillardin buyan jenubiy déngizdiki pütkül déngiz boshluqini “Bizge tewe térritoriye” dep kéliwatqan bolup, bu xil déngiz zomigerliki filippin, malaysiya qatarliq köpligen döletlerni bi'aram qilip kelgen.