Американиң флорида штати хитай пуқралириниң йәр-мүлүккә игә болушини чәклиди

Мухбиримиз әркин
2023.05.08

 Америка флорида штатиниң авам вә кеңәш палаталири өткән һәптә қанун мақуллап, хитай пуқралириниң мәзкур штатта йәр-мүлүккә игә болушини чәклигән. Мәлум болушичә, мәзкур қанун хитайдин башқа американиң русийә, куба, иран, шималий корейә, сүрийә қатарлиқ “рәқиблири” ниңму мәзкур штатта йәр-мүлүккә игә болушини чәкләйдикән.

Флорида штати америкада хитайниң йәр-мүлүккә игә болушини чәклигән бирдинбир штат әмәс. Буниң алдида монтана штатиниң штат башлиқи хитай пуқралириниң деһқанчилиқ мәйданлири, һалқилиқ ул әслиһәләр вә һәрбий әслиһәләрниң әтрапидин йәр сетивелишини чәклигән. Американиң шималий каролина штатиниң кеңәш палатаси бу йил 3-айда чәт әл пуқралириниң мәзкур штатта йәр-мүлүккә игә болушини чәкләш тоғрисидики қанун лайиһәсини мақуллиған иди.

Охшаш бир вақитта вирҗинийә штатиму қанун мақуллап, хитай, иран, куба, русийә қатарлиқ дөләтләрниң һөкүмәт апаратлириниң мәзкур штатта деһқанчилиқ мәйдани сетивелишини мәни қилған иди. “америка авази” радийосиниң хәвәр қилишичә, нөвәттә хитай пуқралириниң йәр-мүлүккә игә болушини чәкләшни ойлишиватқан штатлар техиму көпәймәктә икән.

Америка-хитай мунасивәтлириниң кәшкинлишиши, болупму йеқинда хитай бир җасуслуқ һавашариниң америка һава бошлуқидин учуп өтүп, американиң атлантик деңиз қирғиқида етип чүшүрүлүшидин кейин, хитайниң америкадин йәр сетивелип, җасуслуқ яки бузғунчилиқ билән шуғуллинишиға болған әндишә техиму күчәйгән. Нөвәттә, американиң 11 штатиниң қанун чиқириш яки қануний васитиләрни қоллинип, хитайниң америкада йәр-мүлккә игә болуш мәсилисини һәл қилишни ойлишиватқанлиқи мәлум. Лекин “америка авази” радийосиниң ейтишичә, нөвәттә, флорида штатиниң башлиқи рон дисантосниң имзалишиға сунулған вә бу йил 7-айниң 1-күнидин башлап иҗра қилинидиған бу қанун, флорида штатида турушлуқ хитайларниң наразилиқиға учриған. Улар 6-май күни штатлиқ һөкүмәтниң алдида наразилиқ намайиши өткүзгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.