Amérikaning florida shtati xitay puqralirining yer-mülükke ige bolushini cheklidi

Muxbirimiz erkin
2023.05.08

 Amérika florida shtatining awam we kéngesh palataliri ötken hepte qanun maqullap, xitay puqralirining mezkur shtatta yer-mülükke ige bolushini chekligen. Melum bolushiche, mezkur qanun xitaydin bashqa amérikaning rusiye, kuba, iran, shimaliy koréye, süriye qatarliq “Reqibliri” ningmu mezkur shtatta yer-mülükke ige bolushini chekleydiken.

Florida shtati amérikada xitayning yer-mülükke ige bolushini chekligen birdinbir shtat emes. Buning aldida montana shtatining shtat bashliqi xitay puqralirining déhqanchiliq meydanliri, halqiliq ul esliheler we herbiy eslihelerning etrapidin yer sétiwélishini chekligen. Amérikaning shimaliy karolina shtatining kéngesh palatasi bu yil 3-ayda chet el puqralirining mezkur shtatta yer-mülükke ige bolushini cheklesh toghrisidiki qanun layihesini maqullighan idi.

Oxshash bir waqitta wirjiniye shtatimu qanun maqullap, xitay, iran, kuba, rusiye qatarliq döletlerning hökümet aparatlirining mezkur shtatta déhqanchiliq meydani sétiwélishini men'i qilghan idi. “Amérika awazi” radiyosining xewer qilishiche, nöwette xitay puqralirining yer-mülükke ige bolushini chekleshni oylishiwatqan shtatlar téximu köpeymekte iken.

Amérika-xitay munasiwetlirining keshkinlishishi, bolupmu yéqinda xitay bir jasusluq hawasharining amérika hawa boshluqidin uchup ötüp, amérikaning atlantik déngiz qirghiqida étip chüshürülüshidin kéyin, xitayning amérikadin yer sétiwélip, jasusluq yaki buzghunchiliq bilen shughullinishigha bolghan endishe téximu kücheygen. Nöwette, amérikaning 11 shtatining qanun chiqirish yaki qanuniy wasitilerni qollinip, xitayning amérikada yer-mülkke ige bolush mesilisini hel qilishni oylishiwatqanliqi melum. Lékin “Amérika awazi” radiyosining éytishiche, nöwette, florida shtatining bashliqi ron disantosning imzalishigha sunulghan we bu yil 7-ayning 1-künidin bashlap ijra qilinidighan bu qanun, florida shtatida turushluq xitaylarning naraziliqigha uchrighan. Ular 6-may küni shtatliq hökümetning aldida naraziliq namayishi ötküzgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.