Америка дөләт мәҗлиси әзаси томас сузи җов байденға хәт йезип, гүлшән аббас қатарлиқларни қутулдурушқа чақирған

Америка дөләт мәҗлиси авам палата әзаси томас сузи (Thomas R. Suozzi) 27-Ноябир күни америка пирезиденти җов байденға мәктуп йезип, хитайниң түрмисидә йетиватқан дохтур гүлшән аббасни қоюп бериш үчүн хитайға бесим қилишқа чақирған.

Мәктупта мундақ дейилгән: “пирезидент җанаблири, бу нөвәтлик һөкүмәтниң бир нәччә айла вақти қалди, мән мушу пурсәттә сизни дипломатийә җәһәттики барлиқ тиришчанлиқиңизни көрситип, хитай тәрипидин сиясий җинайәтчи дәп қанунсиз қамалған гүлшән аббасниң түрмидин қоюп берилишигә капаләтлик қилишқа чақиримән”.

Томас сузи бу мәктупта йәнә, хамас қораллиқ күчлири 2023-йил 10-айда  исраилийәгә террорлуқ һуҗум қилғанда гөрүгә еливалған өмәр нютра (Omer Neutra) исимлик бир америка пуқрасини қутулдуруп чиқишқа чақириқ қилған.     

Томас сузи бу мәктупида, гүлшән аббасниң саламәтлик әһвалиниң изчил начарлишип бериватқанлиқини, өмәрниң саламәтлик әһвалиниму билгили болмайдиғанлиқини, келәр нөвәтлик һөкүмәт бу ишларни қолға алғучә уларниң әһвалиниң хәтәрлик болуп қалидиғанлиқини,  уларни аилиси билән йүз көрүштүрүш үчүн бу бир нәччә айниң ахирқи пурсәт икәнликини әскәртип: “пирезидент җанаблири, сиз вәзипә өтәватқан ахирқи айларда ашу мәһкумларни қутулдурушниң наһайити муһим хизмәт икәнликини билдүргән идиңиз, мана һазир сизниң ашу вәдиңизни орунлайдиған вақтиңиз кәлди. Биз буниңлиқ билән тохтап қалмай, йәниму көп ишларни қилишимиз керәк.  Мән зиянкәшликкә учриғучилар вә уларниң аилиси үчүн, уларниң кәлгүсидин наһайити әндишә қиливатимән. Әгәр сизниң бу ахирқи бир нәччә айлиқ вәзипә муддитиңиздә, улар йәнила түрмидә ятса буниңдин техиму әндишә қилимән. Шуңа мән сизниң барлиқ тиришчанлиқиңизни көрситип, уларни аилиси билән җәм қилишиңизни тәләп қилимән” дегән.