Amérika xitay bilen rusiyege küchni merkezleshtürüsh üchün 24 ming herbiy wezipe ornini qisqartqan

Amérika quruqluq armiyesi asasliq küchni xitay bilen rusiyege qaritish üchün, 24ming herbiy wezipe ornini qisqartqan. Bu wezipe orunliri asasen amérikaning 20 yildin buyan térrorluqqa zerbe bérish üchün tesis qilghan orunliri iken.

“Nyu-york waqti géziti” 28-féwral küni bergen bu xewerge asaslan'ghanda, bu wezipe ornini qisqartish sabiq prézidént donald tramp dewride bashlan'ghan bolup, baydén hökümitining dölet mudapi'e istratégiyesige uyghun bolghanliqi üchün qollashqa érishken. Chünki rusiye bilen xitayning künséri küchiyiwatqan tehditi buninggha seweb bolghan.

Xewerde éytilishiche, afghanistan we iraq urushi mezgilide, amérika quruqluq armiyesi 600 ming ademni köpeytken bolup, bu urushlar ayaghlashqandin kéyin adem sanida aziyish bolghan. Amérika quruqluq armiye bash qomandani rendi jorj (Randy George) ning bildürüshiche, bu qétim qisqartilghan 24 ming wezipe orni amérikaning kelgüsi urushlarda ghelibe qilishigha kapaletlik qilalmaydighan artuqche wezipe orunliri iken.

Emma ötken yil 10-ayning 7-küni, xamas qoralliq küchlirining isra'iliyege hujum qilishi, yeni térrorluq weqesining qayta bash kötürüshi bilen amérika dölet mudapi'e ministirliqi ottura sherqte qayta esker köpeytishni oylishish mesilisige duch kelgen.