Американиң толуқ қоралланған бир уруш парахоти җәнубий деңизниң дәталаштики районлирида һәрикәт қилған

Мухбиримиз шөһрәт һошур
2019-04-11
Елхәт
Пикир
Share
Принт

«Билумберг хәвәрлири» вә фирансийә агентлиқи қатарлиқларниң билдүрүшичә, 9-апрел чаршәнбә күни американиң аз дегәндә 10 данә F-35 типлиқ көрәшчи айропилани билән толуқ қоралланған зор һәрбий парахоти җәнубий деңизда дәталаштики районларда һәрикәт қилиш арқилиқ хитайға йәнә бир қетим күчлүк сигнал бәргән.

Мәзкур хәвәрләрдә баян қилинишичә, USS Wasp дәп атилидиған, деңизда вә қуруқлуқта охшашла һәрикәт қилалайдиған уруш парахоти чаршәнбә күни филиппин билән ортақ һәрбий манивер өткүзгән. Мәзкур һәрбий парахот хитай өзигә тәвәликини илгири сүрүп игиливалған «сикарборо деңиз төпилики» гә 25 деңиз мили келидиған йәрдә һәрикәт қилған. Гәрчә америка дөләт мудапиә министирлиқи бу һәрикитини ениқ дәлиллимигән болсиму, бирақ әтраптики филиппинлиқ белиқчилар тартқан көрүнүшләрдә уруш парахотидики күрәшчи айропиланларниң учуп-қонғанлиқи көрүлгән.

Хәвәрләргә қариғанда, бу американиң толуқ қоралланған уруш парахоти арқилиқ җәнубий деңизниң сәпәр әркинлики мәсилисидә хитайға бәргән ениқ сигнали болуп һесаблинидикән.

Хитай ташқи ишлар министирлиқиниң баянатчиси лу каң чаршәнбә күнидики баянатида бу һәқтә тохтилип, «районға тәвә болмиған дөләтләр җәнубий деңизда қалаймиқанчилиқ туғдурмаслиқи керәк,» дегән.

Мәлум болушичә, бу қетим америка билән филиппинниң бирләшмә маневириға икки дөләтниң 7000 нәпәрдин артуқ әскирий күчи қатнашқан.

Пикирләр (0)
Share
Толуқ бәт