Amérika awstraliyede turushluq qisimlirini köpeytip, xitaygha qarita mudapiye tedbirlirini kücheytmekte

Amérika dölet mudapiye ministiri a'ustin liloyd xitaygha bolghan ortaq endishilerni közde tutup, amérikaning awstraliyede turushliq bombardimanchi we küreshchi ayrupilanlirini öz ichige alghan hawa, quruqliq we déngiz qisimlirining qerellik nöwet almishishi kücheytilidighanliqini bildürgen. Amérika simliq xewerler tori CNN ning xewer qilishiche, a'ustin liloyd 6-dékabir washin'gtonda ötküzülgen awstraliye-amérika ministir derijilikler meslihetlishish söhbitidin kéyin muxbirlargha söz qilip, yighinda ikki terepning “Yaponiyenimu astraliyediki qisimlirimiz bilen birlishishke teklip qilishni qarar qilghanliqi” ni éytqan.

6-Dékabir washin'gtonda ötküzülgen 32-qétimliq awstraliye-amérika ministir derijilikler meslihetlishish söhbitige a'ustin liloyd we awstraliye dölet mudapiye ministiri richard marlés bilen bir waqitta amérika tashqiy ishlar ministiri blinkén bilen awstraliye tashqiy ishlar ministiri paniy wongmu qatnashqan. Lékin CNN ning éytishiche, a'ustin liloyd, qisimlarning almishishi qachan köpiyidighanliqi yaki buninggha qanchilik esker, paraxot we urush ayropilanlirining qatnishidighanliqigha a'it tepsilatlar toghrisida uchur bermigen.

U amérika bilen a'ustraliye rayondiki döletlerning kélechikini özi belgilesh tessewurigha ortaqlishidighanliqini bildürüp, “Epsuski, bügün bu tesewwur xirisqa duch kelmekte. Xitayning teywenni öz ichige alghan hindi-ténch okyanning her qaysi jayliridiki aral döletlirige we sherqiy hem jenubiy déngizdiki xeterlik we zorlash xaraktérlik heriketliri rayon tinchliqi we muqimliqigha tehdit salmaqta” dégen.

Simliq xewerler torining éytishiche, bu yil 10-ayda weqedin xewerdar bir uchur menbesi, amérikaning shimaliy awstraliyediki hawa armiye bazisigha 6 dane yadro oq béshini élip yüridighan B-52 tipliq bombardimanchi ayropilan orunlashturushni pilanlawatqanliqini éytqan.