Америка һөкүмити илһам тохти қолға елинғанлиқиниң 10 йиллиқи мунасивити билән баянат елан қилди

Вашингтондин мухбиримиз әзиз тәйярлиди
2024.01.15

15-январ күни америка ташқи ишлар министирлиқи баянат елан қилип, хитай һөкүмити муддәтсиз қамақ җазасиға һөкүм қилған уйғур зиялийси илһам тохтини тездин вә шәртсиз қоюп беришкә чақирди.

Баянатта хитай һөкүмитиниң уйғурлар үчүн әң әқәллий кишилик һәқләрни тәләп қилған бир зиялийни муддәтсиз қамаққа һөкүм қилиши кәскин тәнқидлинип “бу қамақ җазаси шуни көрситидуки, хитай хәлқ җумһурийити ш у а р да иҗра қилиниватқан тәңсиз вә кәмситиш характеридики сиясәтләрни, җүмлидин қирғинчилиқ вә инсанийәткә қарши җинайәтләрни тәнқид қилишқа җүрәт қилған җасарәтлик садаларни өчүрүшкә пүтүн күчи билән урунмақта” дейилиду. Шуниң билән биргә хитай һөкүмити уйғур диярида һелиһәм иҗра қиливатқан түрлүк зулумларни әйибләп, илһам тохтиниң тездин қоюп берилиши лазимлиқини, буниңға һечқандақ шәрт қоюшқа болмайдиғанлиқини әскәртиду.

15-январ күни чех җумһурийитиниң пайтәхти пирага шәһиридә “васлав хавел кутупханиси” ниң орунлаштуруши билән “илһам тохтиға әркинлик: илһам тохтиға беғишланған кечә” темисида мәхсус паалийәт өткүзүлгән.  Илһам тохти тутқун қилинғанлиқиниң 10 йиллиқиға беғишланған мәзкур хатириләш паалийитидә “илһам тохти гурупписи” ниң мәсуллиридин әнвәр җан вә башқа шәхсләр, җүмлидин җәвһәр илһам, өндрей килимес қатарлиқлар айрим-айрим сөз қилип хитай һөкүмитиниң уйғурларни бастуруш қилмишини охшимиған нуқтилардин әйиблигән. Шу күнниң өзидә дуня уйғур қурултийи қатарлиқ һәрқайси тәшкилатлар вә шәхсләрниң илһам тохти һәққидики түрлүк баянатлири вә қисқа учурлириму һәрқайси иҗтимаий таратқулардин кәң орун алди.

Бейҗиңдики “мәркизий милләтләр университети” ниң пирофессори илһам тохти 2014-йили 15-январда қолға елинған һәмдә “бөлгүнчилик” җинайити билән муддәтсиз қамаққа һөкүм қилинған иди. 

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.