Amérika we uning ittipaqdashliri xitayning bosughisida herbiy manéwir qildi

 “Heptilik xewerler” gézitining 9-öktebirdiki xewiride éytilishiche, amérika déngiz armiyesi we bashqa döletlerning déngiz armiyeliri 7-öktebirde filippin déngiz armiyesi bashlighan herbiy manéwirgha qatnashqan.

Xewerde éytilishiche, bu qétimqi manéwirgha “Sama sama” dep nam bérilgen bolup, tagalog tilida “Birlikte” dégen menini bildüridiken. Bu manéwirgha amérika we filippin déngiz armiyesidin bashqa yaponiye, firansiye, awstraliye, kanada we en'gliye déngiz armiyelirimu qatnashqan. Toqquz künlük manéwir waqit jehette xitay déngiz armiyesi jenubiy déngizdiki zémin dawasini ewjige chiqiriwatqan mezgilge toghra kelgen. Amérika déngiz armiyesi 7-filotining qomandani tod simikata (Todd Cimicata) bu qétimqi manéwirning “Düshmenni tosush meshqi üchün orunlashturulghanliqini, buning birer döletke qaritilmighanliqini” tekitligen. Emma közetküchiler buninggha xitaygha qarshi qétimliq sinaq bolghanliqini qeyt qilghan.

Bu qétimliq manéwirgha qatnashqan eskerlerning sani minggha yéqin bolup, herqaysi döletlerning urush paraxotliri we urush ayropilanliri maharet körsetken. Manéwir orni bolghan luzon (Luzon) shehiri bolsa “Amérika-filippin mudapi'e hemkarliq ehdinamisi” boyiche amérika déngiz armiyesi filippinda qurup chiqqan toqquz herbiy bazining beshi jaylashqan orun hésablinidu. Xewerde éytilishiche, bu jaydiki amérika armiyesining ottura musapilik rakétaliri xitayning sherqiy qismidiki déngiz boylirigha bimalal yétip baralaydiken. Shu sewebtinmu xitay hökümiti izchil filippin da'iriliridin bu herbiy bazini bikar qilishni köp qétim telep qilghan.