Amérika dölet mejlisining jumhuriyetchi we démokratchi ezaliri Uyghurlar mesiliside perqliq taktika qollanmaqtiken

Amérika dölet mejlisining jumhuriyetchi we démokratchi palata ezaliri diqqitini xitayning Uyghurlarni basturushigha merkezleshtürüwatqan bolsimu, emma baydén  hökümitini Uyghurlar üchün téximu köp ishlarni qilishqa zorlashta perqliq taktika qollanmaqta iken.

“Nyu-york waqti” gézitining 25-séntebir bergen xewiride bildürüshiche, démokratchilar partiyesidin bolghan awam palata ezasi rétchi torrés (Ritchie Torres), bu hepte aqsarayning döletlik istixbarat ishxanisi diréktori awril xéynis (Avril Haines) qa mektup yézip, hökümetni xitayning Uyghurlargha tutqan mu'amilisi heqqide doklat sunmighanliqini tenqid qilghan. Xewerde, rétchi torrésning mezkur mektupta nahayiti qattiq sözlerni ishletkenliki qeyt qilinmaqta.

Amérika dölet mejlisi ötken yili maqullighan qanunida, aqsarayning döletlik istixbarat diréktori ishxanisining dölet mejlisige xitayning Uyghurlarni depsende qilish ehwali heqqide yilliq doklat yollishi telep qilin'ghan. Doklat yollash waqti bu yil 6-ayda toshqan bolsimu, emma bu doklat téxi yollanmighan. “Nyu-york waqti” gézitining bildürüshiche, rétchi torrés mektupta mundaq dégen: “Bu resmiy heriketlerdin kéyin, istixbarat orunliri xitay kompartiyesining Uyghur musulmanlirigha qaratqan basturush, irqiy qirghinchiliq heriketlirining hazirqi ehwali toghriliq jimip ketti. Shu seweblik men omumiy jehettin fédiral hökümetning, bolupmu istixbarat orunlirining gas-gachidek jimip kétishidin qattiq bi'aram bolmaqtimen.”

Xewerde yene kishilik hoquq mesilisi her ikki partiye palata ezalirining diqqet nuqtisi bolsimu we ikki partiye palata ezalirining bu mesilidiki pikiri izchil birdek bolup kelgen bolsimu, emma amérika pirézidéntliq saylimining yéqinlishishigha egiship ularning perqliq taktika qolliniwatqanliqi bildürülgen. Xewerde éytilishiche, démokratchilar jumhuriyetchilerning yéqinda maqullighan xitaygha munasiwetlik qanunlirining teywen, tibet we Uyghurlargha yardimi bolmaydighanliqi, jumhuriyetchilerning herikiti xitay bilen bolghan diplomatiye qanilini taqaydighanliqini tekitlise؛ jumhuriyetchiler xitaygha “Quruq söz” ning aqmaydighanliqini bildürmekte iken.