“Amérika moda sahesi birleshmisi” Uyghur mejburiy emgikige chétishliq mehsulatlargha alahide diqqet qiliwatqanliqini bildürgen

“Amérika moda sahesi birleshmisi” (USFIA) ning pirézidénti juliya xugis xanim yéqinda özlirining tor bétide élan qilghan obzorida moda kiyim-kéchekler sahesining Uyghur diyaridiki mejburiy emgekke baghlinishliq bolghan mehsulatlargha alahide diqqet qilishqa bashlighanliqini, bu sahediki tirishchanliqini bikargha ketmigen, déyishke bolidighanliqini alahide tekitligen.

 15-Yanwar élan qilin'ghan obzorda éytilishiche, amérika hökümiti maqullighan we resmiy qanun'gha aylan'ghan “Uyghur mejburiy emgikining aldini élish qanuni” amérika soda sahesi, bolupmu moda kiyim-kéchekler sahesining Uyghur mejburiy emgikige shérik bolup qalmasliqini qanuniy asaslar bilen temin etken. U bu heqte toxtilip, herqaysi dangliq marka sahibliri we top tarqitish shirketlirining öz teminlesh zenjiridiki mejburiy emgek amillirini eng töwen chekke chüshürüshke tirishiwatqanliqini eskertken. U buningdiki herqaysi tereplerni tilgha élip, “Biz dawamliq halda amérika dölet mejlisi, ana weten xewpsizlik ministirliqi, emgek ministirliqi qatarliqlar bilen zich hemkarliship, moda kiyim-kéchekler sahesining mejburiy emgekke baghlinip qalmasliqini eng zor derijide kapaletke ige qilimiz” dégen.

 Obzorda éytilishiche, 11-yanwar küni amérika awam palatasida ötküzülgen guwahliq yighinida “Mupettishlik we jawabkarliq” bölümining diréktori dan bishop (Dan Bishop) bu heqte mexsus söz qilghan. U sözide xitayda ishliniwatqan toqumichiliq mehsulatlirining mutleq köp qismigha Uyghur diyaridin chiqidighan paxta ishlitilidighanliqini, shunga bu jaydiki paxtigha chétishliq herqandaq mehsulatni birdek mejburiy emgek bilen alaqidar, dep qarash lazimliqini otturigha qoyghan. Shuningdek amérika tamozhna we chégra qoghdash idarisi musadire qiliwatqan toqumichiliq mehsulatlirining emeliyette Uyghur mejburiy emgikige baghlinishliq mehsulatlarning peqet “Kichikkine bir qismi” ikenlikini alahide eskertken. Bu qétimqi guwahliq yighinida otturigha qoyulghan tewsiyeler qataridiki “Cheklesh da'irisini bashqa 27 döletke kéngeytish”, “Xilapliq qilghuchilargha bérilidighan jaza we tekshürüshni kücheytish” qatarliq tedbirler bu jehettiki aktip bir qedem, dep qaralmaqta.