Американиң 2022-малийә йилиға аит "дөләт мудапийә һоқуқи қануни" да хитайға тақабил туруш тәкитләнгән

Мухбиримиз ирадә
2021-09-23
Share

Америка авам палатаси 2022-малийә йилиға аит "дөләт мудапийә һоқуқи қануни" лайиһәсини мушу айниң ахири авазға қоюшқа тәйярлаватқан болуп, бу лайиһәдә уйғурларға йеқиндин мунасивәтлик маддилар мәвҗут икән.

"америка авази" радийосиниң хәвәр қилишичә, америка авам палатасида 22-сентәбир күни мәзкур "дөләт мудапийә һоқуқи қануни" тоғрисида муназирә елип берилған болуп, у америка дөләт мудапийә министирлиқиниң дуняви техника әвзәлликини мустәһкәмләш вә американиң хитайниң күнсери күчийиватқан тәһдитигә тақабил туруш иқтидариға капаләтлик қилишни мәқсәт қилған икән. Униңда йәнә хитай һөкүмитиниң уйғурларға қаритиватқан кишилик һоқуқ дәпсәндичиликигә қарши туруш тәдбирлириму оттуриға қоюлған. Булар уйғур елиға мунасивәтлик мәһсулатларни сетивелишни чәкләш вә америка һөкүмәт әмәлдарлириниң 2022-йиллиқ бейҗиң қишлиқ олимпик тәнһәрикәт мусабиқисигә қатнишишини иқтисадий җәһәттин қоллашни чәкләш қатарлиқларни өз ичигә алидикән.

"америка авази" ниң баян қилишичә, 2022-малийә йилидики "дөләт мудапийә һоқуқи қануни" да уйғур елидики давам қиливатқан зулум көп қетим тилға елинған. "дөләт мудапийә һоқуқи қануни" ниң 836-маддисида мундақ дейилгән: "бу қанунда бәлгиләнгән яки дөләт мудапийә министирлиқиға 2022-малийә йилида берилгән мәбләғни биваситә яки вастилиқ һалда мәҗбурий әмгәк билән шуғуллинидиған шинҗаң уйғур аптоном районидики ишләпчиқириш вә кан ечишқа мунасивәтлик мәһсулатларни сетивелишқа болмайду."

Бу қанун лайиһәсиниң 1323-маддисида, америка һөкүмәт әмәлдарлирини рәсмий салаһийити билән бейҗиң қишлиқ олимпик тәнһәрикәт мусабиқисигә қатнишишини қатнаш мулазимити билән тәминләш чәкләнгән. Бу мадда американиң бу тәнһәрикәт мусабиқисини дипломатик байқут қилишиға четишлиқ болуши мумкин икән.

Омумий җәһәттин алғанда, авам палатасиниң "дөләт мудапийә һоқуқи қануни" тор бихәтәрлики, пән-техника тәрәққияти вә учур системиси тәрәққиятини күчәйтишни, био-техника, йөнилишлик енергийә қатарлиқ түрләрни өз ичигә алған муһим тәтқиқат вә тәрәққият саһәлиригә мәбләғ селишни көрүнәрлик ашуридикән.

2022-Малийә йилиға аит "дөләт мудапийә һоқуқи қануни" бойичә авам палатаси йеңи бәш йилда бәшбурҗәклик бинаниң хамчотини 770 милярд доллар, дәп мөлчәрлигән болуп, байдин һөкүмити оттуриға қойған хамчоттин 25 милярд доллар көпәйтилгән икән.

Авам палатаси қораллиқ мулазимәт комитетиниң рәиси, авам палата әзаси адам симис 21-сентәбир күни авам палатадики муназиридә қилған сөзидә мундақ дегән: "бу қанун лайиһәси алаһидә муһим, чүнки биз бу дөләтни қоғдаш вә дунядики ролимизни бир тәрәп қилиштики муһим пәйттә туруватимиз, биз әзәлдин һазирқидәк мурәккәп һәм тәһдит ичидики муһитиға дуч келип бақмиған. Биз росийә, хитай, иран, шималий корийә вә дөләт һалқиған терорлуқ тәшкилатлириниң тәһдитигә дуч келиватимиз."

Авам палатаси қораллиқ мулазимәт комитетиниң җумһурийәтчиләр партийәсидин болған башлиқи майк роҗерс болса "хитайниң йеңидин гүллиниватқан техника вә қорал системисидики илгирилиши биздин ешип кәтти. Биз хитайниң бу иқтидарларни пәқәт дөләт мудапийәси үчүнла тәрәққий қилдурмиғанлиқини билимиз," дегән.

1300 Бәтлик бу "дөләт мудапийә хираҗити қанун лайиһәси" илмий тәтқиқат вә тәрәққият, кишилик һоқуқ мәсилиси, корона вирусиниң келип чиқиши вә хәлқара тәсир көрситиш һәрикити қатарлиқ нурғун тәрәпләрдин хитайға четилидиған болуп, бу икки тәрәпниң күнсери күчийиватқан тиркишиш вәзийитини гәвдиләндүрүп беридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт