Amérikaning 2022-maliye yiligha a'it “Dölet mudapiye hoquqi qanuni” da xitaygha taqabil turush tekitlen'gen

Muxbirimiz irade
2021.09.23
Share on WhatsApp
Share on WhatsApp

Amérika awam palatasi 2022-maliye yiligha a'it “Dölet mudapiye hoquqi qanuni” layihesini mushu ayning axiri awazgha qoyushqa teyyarlawatqan bolup, bu layihede Uyghurlargha yéqindin munasiwetlik maddilar mewjut iken.

“Amérika awazi” radiyosining xewer qilishiche, amérika awam palatasida 22-séntebir küni mezkur “Dölet mudapiye hoquqi qanuni” toghrisida munazire élip bérilghan bolup, u amérika dölet mudapiye ministirliqining dunyawi téxnika ewzellikini mustehkemlesh we amérikaning xitayning künséri küchiyiwatqan tehditige taqabil turush iqtidarigha kapaletlik qilishni meqset qilghan iken. Uningda yene xitay hökümitining Uyghurlargha qaritiwatqan kishilik hoquq depsendichilikige qarshi turush tedbirlirimu otturigha qoyulghan. Bular Uyghur éligha munasiwetlik mehsulatlarni sétiwélishni cheklesh we amérika hökümet emeldarlirining 2022-yilliq béyjing qishliq olimpik tenheriket musabiqisige qatnishishini iqtisadiy jehettin qollashni cheklesh qatarliqlarni öz ichige alidiken.

“Amérika awazi” ning bayan qilishiche, 2022-maliye yilidiki “Dölet mudapiye hoquqi qanuni” da Uyghur élidiki dawam qiliwatqan zulum köp qétim tilgha élin'ghan. “Dölet mudapiye hoquqi qanuni” ning 836-maddisida mundaq déyilgen: “Bu qanunda belgilen'gen yaki dölet mudapiye ministirliqigha 2022-maliye yilida bérilgen mebleghni biwasite yaki wastiliq halda mejburiy emgek bilen shughullinidighan shinjang Uyghur aptonom rayonidiki ishlepchiqirish we kan échishqa munasiwetlik mehsulatlarni sétiwélishqa bolmaydu.”

Bu qanun layihesining 1323-maddisida, amérika hökümet emeldarlirini resmiy salahiyiti bilen béyjing qishliq olimpik tenheriket musabiqisige qatnishishini qatnash mulazimiti bilen teminlesh cheklen'gen. Bu madda amérikaning bu tenheriket musabiqisini diplomatik bayqut qilishigha chétishliq bolushi mumkin iken.

Omumiy jehettin alghanda, awam palatasining “Dölet mudapiye hoquqi qanuni” tor bixeterliki, pen-téxnika tereqqiyati we uchur sistémisi tereqqiyatini kücheytishni, bi'o-téxnika, yönilishlik énérgiye qatarliq türlerni öz ichige alghan muhim tetqiqat we tereqqiyat sahelirige meblegh sélishni körünerlik ashuridiken.

2022-Maliye yiligha a'it “Dölet mudapiye hoquqi qanuni” boyiche awam palatasi yéngi besh yilda beshburjeklik binaning xamchotini 770 milyard dollar, dep mölcherligen bolup, baydin hökümiti otturigha qoyghan xamchottin 25 milyard dollar köpeytilgen iken.

Awam palatasi qoralliq mulazimet komitétining re'isi, awam palata ezasi adam simis 21-séntebir küni awam palatadiki munaziride qilghan sözide mundaq dégen: “Bu qanun layihesi alahide muhim, chünki biz bu döletni qoghdash we dunyadiki rolimizni bir terep qilishtiki muhim peytte turuwatimiz, biz ezeldin hazirqidek murekkep hem tehdit ichidiki muhitigha duch kélip baqmighan. Biz rosiye, xitay, iran, shimaliy koriye we dölet halqighan térorluq teshkilatlirining tehditige duch kéliwatimiz.”

Awam palatasi qoralliq mulazimet komitétining jumhuriyetchiler partiyesidin bolghan bashliqi mayk rojérs bolsa “Xitayning yéngidin gülliniwatqan téxnika we qoral sistémisidiki ilgirilishi bizdin éship ketti. Biz xitayning bu iqtidarlarni peqet dölet mudapiyesi üchünla tereqqiy qildurmighanliqini bilimiz,” dégen.

1300 Betlik bu “Dölet mudapiye xirajiti qanun layihesi” ilmiy tetqiqat we tereqqiyat, kishilik hoquq mesilisi, korona wirusining kélip chiqishi we xelq'ara tesir körsitish herikiti qatarliq nurghun tereplerdin xitaygha chétilidighan bolup, bu ikki terepning künséri küchiyiwatqan tirkishish weziyitini gewdilendürüp béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.