Американиң бир мәслиһәтчилик ширкити америкадин вә хитайдин тәң пул тапқанлиқи үчүн әйибләнгән

Америка дөләт мәҗлиси кеңәш палата әзаси җош һавли (Josh Hawley)  5-феврал күни дөләт мәҗлисидә өткүзүлгән испат аңлаш йиғинида мәккинси мәслиһәтчилик ширкити (McKinsey Consulting Firm) ниң бир яқтин хитай карханилириға мулазимәт қилип, бир яқтин америка һөкүмити билән тохтамлашқанлиқини әйиблигән һәмдә америка ширкәтлириниң бундақ қилишини чәкләш үчүн бир қанун лайиһәси сунғанлиқини билдүргән.

“америка авази” таратқуси бу һәқтә X дә елан қилған видийода көрситилишичә, кеңәш палата әзаси җош һавли мәккинси мәслиһәтчилик ширкитиниң хитайдики 100 чоң ширкәтниң ичидә 22 карханиға мәслиһәтчилик қилидиғанлиқини, уларниң ичидә хитай хәлқ азадлиқ армийәсиниң арқа сәп қурулушиға ярдәм беридиған вә қара тизимликкә елинған хитай қатнаш қурулуш ширкити қатарлиқ карханиларниң барлиқини, буларниң американиң хәвпсизликигә биваситә тәһдит салидиғанлиқини, шундақ туруқлуқ бу ширкәтниң йәнә америка дөләт мудапиә министирлиқи билән түзгән тохтамдин 8 милярд 500 миң доллардин көп пул тапқанлиқини оттуриға қойған.

Кеңәш палата әзаси җош һавли мәккинси мәслиһәтчилик ширкитиниң иҗраийә директори боб стәрнфелс (Bob Sternfels) ни гуваһлиққа тартқанда,  мәзкур ширкәтниң ахирқи һесабта хитай дөләт мудапиә министирлиқи үчүн ишләватқанлиқини, әмма америкаға хитай һәққидә һечқандақ учур бәрмигәнликини, хитайдин милйонлап пул тепиш билән қалмай, америка һөкүмитидинму мәнпәәт еливатқанлиқини қаттиқ әйиблигән. Җош һавли мундақ дегән: “силәр бизниң дүшминимиздин көпләп пул таписиләр, андин бир домилапла биздинму нурғун пайда үндүрүсиләр. Очуқини ейтқанда, бу тазиму қамлашмиғанлиқ! силәр хитай компартийәси вә униңға четишлиқ һәр қандақ ширкәткә мулазимәт қилмаслиқиңлар, америка һөкүмитидинму пул алмаслиқиңлар керәк. Мән силәрни чәкләш үчүн бир қанун лайиһәсини сундум!”