Amérikining pakistan siyasiti xitaygha éghir bésim peyda qilmaqta

Muxbirimiz eziz
2018.04.19

Amérika hökümiti ötken yilidin tartip pakistan'gha bériwatqan ghayet zor miqdardiki herbiy yardemni toxtatqandin buyan ikki terep munasiwiti yamanlishishqa yüz tutqanliqi melum.

Pakistan hökümitimu buninggha mas halda özlirining xitay bilen bolghan “Dostluq” munasiwitini kücheytishke tirishqan. Buning bilen xitaygha chüshken bésimmu éship barghan. “Diplomat” zhurnilida 18-aprél élan qilin'ghan li xongméy imzasidiki maqalida del mushu mesililer nuqtiliq muhakime qilinidu.

Maqalida körsitilishiche, amérikining xelq'araliq tesiri, bolupmu uning xelq'ara pul-mu'amile dunyasidiki tesiri tüpeylidin pakistan xelq'arada yétim qalmaqta iken. Bolupmu amérikining iqtisadiy jehettiki cheklesh tedbiri pakistan bilen iqtisadiy alaqide boluwatqan köpligen döletlerni amérika terepte turushqa ündimekte iken. Buning bilen pakistanning “Arqa tiriki” boluwatqan xitay pakistan'gha iqtisadiy jehette téximu köp yardem bérishke mejbur bolmaqta iken. Aptor bu heqte toxtilip “Pakistanning birdinla ‛geden'giche‚ qerzge boghulushini köp qisim pakistanliqlar xitaydin körmekte,” deydu.

Aptorning qarishiche, amérika-pakistan munasiwitining yamanlishishi yene bir yaqtin hindistan bilen pakistan otturisidiki toqunushlarning ewjige chiqishigha shuningdek afghanistanning bu sewebtin téximu zor qalaymiqanchiliqqa muptila bolushigha seweb bolidiken. Bu bolsa biwasite yaki wasitilik halda xitayning chégra liniyelirige xewp peyda qilishi mumkin iken.

Maqalida körsitilishiche, nawada xitay mushu yosunda amérika “Térrorluqqa qarshi turushta boshangliq qildi” dep eyiblewatqan pakistanni zor küch bilen qollawerse, xitayning xelq'ara térrorluqqa qarshi küreshtiki obrazigha dagh chüshidiken. Eksiche xitay xelq'ara éqimgha egiship pakistanni eyiblise u halda “Qoshnisigha satqunluq qilghan” dégen namni élip qélishi mumkin iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.