Besh burjeklik bina pakistan'gha qaritilghan herbiy yardimini toxtatti

“Hindistan waqti” we “Amérika awazi” qatarliqlarning xewirige qarighanda, amérika dölet mudapi'e ministiri ashton kartér amérika dölet mejlisige pakistan'gha qaritilghan iqtisadiy yardem heqqide ijazetname bérishni ret qilghan. Xewerlerde éytilishiche, mezkur ijazetname bolmighan ehwalda amérika dölet mejlisi pakistan'gha iqtisadiy yardem fondi ajritishqa ilajsiz qalidiken.

“Soda ölchimi” toridiki uchurlardin melum bolushiche, ashton kartérning mezkur herikiti amérika hökümiti pakistanni teminlimekchi bolghan 300 milyon dollarliq “Hemkarliq yardem meblighi” ni tonglitip qoyghan'gha barawer iken. Alaqidar menbelerde éytilishiche, mezkur meblegh amérikining afghanistandiki herbiy meshghulatliri üchün hemkarlishiwatqan pakistan armiyesige yardem ornida bérilmekchi bolghan.

Besh burjeklik binaning bayanatchisi adem stamp bu heqte toxtilip “300 Milyon dollarliq meblegh pakistan hökümitige ewetilmeydu. Chünki ötken yili pakistan hökümiti ‛heqqaniy tori‚ gha qarshi kishi razi bolghudek heriket qollanmidi” dégen.

Pakistan'gha ötken yili bir milyard dollarliq iqtisadiy yardem wede qilin'ghan bolup, hazirghiche buningdin 700 milyon dollarliq yardem jayigha yetken.

Melum bolushiche, 2002 - yilidin buyan pakistan hökümiti amérikidin jem'iy 14 milyard dollarliq “Hemkarliq yardem puli” alghan bolup, bu qétimqi weqe mezkur yardem pulining tunji qétim toxtitip qoyulushi iken.

Xewerde éytilishiche, “Heqqaniy tori” amérikining afghanistandiki menpe'itige éghiz ziyan salghan térrorluq teshkilati iken.