Amérika pirézidénti jow baydin noruzni tebriklep bayanat élan qildi

“Aqsaray tori” (The White House) torining 2024-yili 3-ayning 19-künidiki mexsus xewirige asaslan'ghanda, amérika pirézidénti jow baydin dunyadiki noruz bayrimini tebrikleydighan xelqlerni tebriklep bayanat élan qilghan.

Bayanatta mundaq déyilgen: “Bügün, men we xanimim ikkimiz dunyadiki milyonlighan kishining oyghinish, özini yéngilash we qaytidin janlinish küni bolghan noruzni tebrikleymiz. Dölitimizdiki noruz ehli bir yerge jem bolup bu bayramni tebrikligende we uni amérika medeniyitidiki xushalliqning bir qismigha aylandurghanda, u amérika rohini eks ettüridu hem bizge ümid béghishlaydu” .

Xitaydiki ehwal buning eksiche bolup, 2017-yildin buyan, Uyghurlarning roza héyt, qurban héytqa oxshash diniy bayramlirini ötküzüshi, hetta noruzgha oxshash iran we türkiy xelqlerge ortaq bolghan bayramlirini tebrikleshmu cheklen'genidi. Emma xitay millitining en'eniwi bayramliridin bolghan chaghan, panus bayrimi, dégendek bayramlarning xitay hökümitining teshwiqati, hetta mejburlishi astida Uyghur élide omumlishishqa yüzlen'genliki melum.

Yéqinda radiyomiz xitay da'iriler Uyghurlarni chaghanliq pa'aliyetlerge keng-kölemde qatnashturush üchün righbetlendürüsh bilen qorqutush tedbirini teng qollan'ghanliqini delilligenidi.

Mutexessisler we kishilik hoquq teshkilatliri Uyghurlarning en'eniwi bayramlirining cheklinip, xitay bayramlirini ötküzüshke mejburlinishini “Medeniyet qirghinchiliqi” ning bir qismi dep bahalighanidi.

Noruz bayrimi Uyghurlarning en'eniwi bahar bayrimi bolup, kün bilen tün tengleshken 3-ayning 21-, 22-künige toghra kélidu. Bu baharning yeni kona yilning axirliship yéngi yilning bashlan'ghanliqidin dérek béridu. Shunga u “Yéngi kün” depmu atalghan. Nöwette muhajirettiki Uyghurlar bu bayramni her xil shekillerde tebriklep kelmekte.