Amérika armiyesi tinch okyanda xitaygha qarshi “Rakéta témi” salmaqchi

“Asiya waqti” gézitining 21-noyabirdiki xewiride éytilishiche, amérika déngiz armiyesi tinch okyan flotining qomandani général charliz fliyn (Charles Flynn) yéqinda kanadadiki nowa skotiya ölkiside échilghan “Xalifakis xelq'ara bixeterlik munbiri” de söz qilip, amérika déngiz armiyesining tinch okyan rayonida xitaygha qarshi yéngidin “Rakéta mudapi'e témi” hasil qilmaqchi boluwatqanliqini bildürgen.

Xewerde éytilishiche, amérika déngiz armiyesi 2024-yilida berpa qilip chiqmaqchi bolghan “Rakéta mudapi'e témi” ottura musapilik rakéta (bashqurulidighan bomba) ni asas qilidighan bolup, kéyinki qedemde uzun musapilik rakéta sistémisi berpa qilishqa ul salidiken. Buningdiki asasliq meqset xitayning teywen'ge herbiy mudaxile yürgüzüshige taqabil turush iken.

“Mudapi'e birinchi” (Defense One) zhurnilining bu heqtiki xewiride éniq qilip, bu qétimqi “Rakéta mudapi'e sistémisi” gha yene 500 kilométir uzaqliqtiki nishanni pachaqlap tashliyalaydighan rakétalarningmu qoshulidighanliqi tilgha élin'ghan. Emma hazirqi weziyette amérika üchün ittipaqdashlardin saniliwatqan awstraliye, jenubi koréye, yaponiye we filippin qatarliq döletler xitay bilen bolidighan iqtisadiy munasiwitini nezerde tutup, amérika déngiz armiyesining bu mudapi'e sistémisigha ishtirak qilishta ikkilinip turmaqta iken. Xewerde bu ehwal toghrisida toxtilip “Shimaliy koréye we xitaydin kéliwatqan tehditning barghanséri éship méngiwatqanliqi tüpeylidin yaponiye hazir bu sistémigha shérik bolushqa qiziqmaqta” déyilgen.

Xewerde éytilishiche, xitay armiyesimu buninggha qarshi bezi tedbirlerni éliwatqan bolup, özining bir qisim rakéta sistémisini déngiz boyi rayonlirigha yötkeshke bashlighan. Shuningdek buning amérika bashchiliqidiki qarshi küchlerning bolghusi hujumlirigha qarshi herbiy teyyarliq ikenlikini eskertken.