Sénator bob ménéndiz amérika kéngesh palatasida Uyghurlarning weziyitini tilgha aldi

Muxbirimiz irade
2019-03-14
Élxet
Pikir
Share
Print

Amérika kéngesh palatasi tashqi munasiwetler komitétida 13-mart küni shi jinping hakimiyiti astidiki xitayning amérika we dunyagha shekillendürüwatqan xewpi we shundaqla amérikining buninggha qarshi siyasetlerni yolgha qoyushi kérekliki heqqide échilghan bir guwahliq bérish yighinida Uyghurlar mesilisi tilgha élindi.

Mezkur guwahliq bérish yighinida Uyghurlargha tonushluq bolghan sénatorlardin bob ménéndaz sözide xitay hökümitining amérikining dölet bixeterlikige iqtisadiy, siyasiy we diplomatiye we medeniyettin ibaret 4 jehettin tehdit shekillendürüwatqanliqini ipade qildi.

U shi jinping hakimiyitining tashqi siyasiti heqqide toxtalghanda uning hazir dölet ichide hakimmutleq tüzümni yolgha qoyup, mutleq kontrolluqni ishqa ashuruwatqanliqini bildürdi. U sözide yene Uyghurlarni tilgha élip "Xitay hökümiti Uyghurlarni rehimsizlerche basturdi. Bir milyondin oshuq kishini qayta terbiye namida tutqun qilip, ularni mejburiy emgek we mutleq nazaretning nishanigha aylandurdi" dédi.

U yuqirida tilgha élin'ghan barliq élimintlarning amérikaning xitay bilen ünümlük munasiwet qurushigha qiyinchiliq peyda qiliwatqanliqini bildürdi we amérika prézidénti trampning xitaygha taqabil turush üchün yenimu keskin siyasetlerni yolgha qoyushi kéreklikini eskertti.

Yighinda yene kéngesh palata ezasi jéymis rishmu söz qildi. U yighindiki kirish sözini "Xitay iqtisadi tereqqiy qilghan teqdirde ularning siyasiy tüzümi libiralliqqa qarap méngishi mumkin dégen arzu bilen 20 yildin béri xitayni qollap kelgen amérika emdi bu köz qarashning xataliqini étirap qilidighan waqitning kelgenlikini tonup yetti" dep bashlidi.

U xitayning amérikaning téxnikilirini oghrilawatqanliqini, xitaygha qoshna döletlerni we shundaqla amérikaning shériklirige tehdit qiliwatqanliqini, öz herbiy küchini kücheytish bilen birge dölet ichide "Saqchi döliti" shekillendürüp, hakimmutleq tüzümini hetta bashqa döletlerge éksport qiliwatqanliqini bildürdi. U xitayning yer shari tertipige éghir tehdit shekillendürüwatqanliqini eskertip, amérika buninggha qarshi jiddiy tedbir élishi kérek, dédi.

Toluq bet