Хитайдин чиқип кетишкә һәрикәт қиливатқан америка ширкәтлири йәниму көпәйгән

CNBC Телевизийәсиниң 23-январ күни елан қилинған бир сода тәкшүрүш доклатиға асасән хәвәр қилишичә, өткән бир йил ичидә хитайдики ишләпчиқириш яки тәминләш зәнҗирлирини йөткәп кетишни пиланлаватқан америка ширкәтлири йәниму көпәйгән.

Америка сода уюшмисиниң хитайдики йиллиқ тәкшүрүшигә қатнашқан америка ширкәтлириниң тәхминән 30 пирсәнти 2024-йили ичидә хитайдин айрилип чиқиш пиланини башлиған болуп, бу 2022-йилидики әң юқири нисбәт болған 24 пирсәнттин ешип кәткән.

Хәвәрдә дейилишичә, буниң асаслиқ сәвәблири америка-хитай оттурисидики сода ихтилапиниң чоңқурлишиши билән бирликтә, хитай иқтисадидики чекиниш вә униң чәт әл ширкәтлиригә қоюватқан түрлүк чәклимә сиясәтлири қатарлиқ амилларға четилидикән.

Хәвәрдә дейилишичә, хитайдин чиқип кетишни ойлишиватқан ширкәтләр үчүн һиндистан вә шәрқий җәнубий асия дөләтлири әң асаслиқ йеңи мәнзил болуватқан болсиму, ишләпчиқиришни америкаға қайтуруп кетишни ойлишиватқан ширкәтләрму 18 пирсәнтни игиләйдикән.

Америка пирезиденти доналд трамп вәзипигә олтуруп икки күн өтмәйла, хитай маллириға қоюлидиған таможна беҗини 10 пирсәнт өстүрүш пилани барлиқини вә бу пиланниң 2-айниң бешидин башлап әмәлийлишиши мумкинликини билдүргән иди. Бундин илгирики байден һөкүмитиму американиң юқири техникилиқ мәһсулатлириниң хитайға експорт қилинишиға кәң даирилик чәклимиләрни қойған иди.

Хитайдики рай синашқа қатнашқан америка ширкәтлириниң 60 пирсәнттин көпрәки америка-хитай арисидики җиддийчиликниң бундин кейин хитай билән сода қилиштики әң чоң риқабәт болуп қалидиғанлиқини билдүрүшкән.