Xitaydin chiqip kétishke heriket qiliwatqan amérika shirketliri yenimu köpeygen

Washin'gtondin muxbirimiz irade teyyarlidi
2025.01.23

CNBC Téléwiziyesining 23-yanwar küni élan qilin'ghan bir soda tekshürüsh doklatigha asasen xewer qilishiche, ötken bir yil ichide xitaydiki ishlepchiqirish yaki teminlesh zenjirlirini yötkep kétishni pilanlawatqan amérika shirketliri yenimu köpeygen.

Amérika soda uyushmisining xitaydiki yilliq tekshürüshige qatnashqan amérika shirketlirining texminen 30 pirsenti 2024-yili ichide xitaydin ayrilip chiqish pilanini bashlighan bolup, bu 2022-yilidiki eng yuqiri nisbet bolghan 24 pirsenttin éship ketken.

Xewerde déyilishiche, buning asasliq sewebliri amérika-xitay otturisidiki soda ixtilapining chongqurlishishi bilen birlikte, xitay iqtisadidiki chékinish we uning chet el shirketlirige qoyuwatqan türlük cheklime siyasetliri qatarliq amillargha chétilidiken.

Xewerde déyilishiche, xitaydin chiqip kétishni oylishiwatqan shirketler üchün hindistan we sherqiy jenubiy asiya döletliri eng asasliq yéngi menzil boluwatqan bolsimu, ishlepchiqirishni amérikagha qayturup kétishni oylishiwatqan shirketlermu 18 pirsentni igileydiken.

Amérika pirézidénti donald tramp wezipige olturup ikki kün ötmeyla, xitay mallirigha qoyulidighan tamozhna béjini 10 pirsent östürüsh pilani barliqini we bu pilanning 2-ayning béshidin bashlap emeliylishishi mumkinlikini bildürgen idi. Bundin ilgiriki baydén hökümitimu amérikaning yuqiri téxnikiliq mehsulatlirining xitaygha éksport qilinishigha keng da'irilik cheklimilerni qoyghan idi.

Xitaydiki ray sinashqa qatnashqan amérika shirketlirining 60 pirsenttin köpreki amérika-xitay arisidiki jiddiychilikning bundin kéyin xitay bilen soda qilishtiki eng chong riqabet bolup qalidighanliqini bildürüshken.

 

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.