Uyghur rayoni bilen yilliq 50 milyon tonna kömürchilik kélishimi imzalighan amérika shirkiti weyran boldi

Muxbirimiz erkin
2016-04-15
Élxet
Pikir
Share
Print

Amérikining eng chong medenchilik shirkiti -pibadiy PeaBody yéqinda mehkimige resmiy weyran bolush iltimasi sundi. Mezkur shirket 2011‏-yili Uyghur rayoni bilen yilliq ishlepchiqirishi 50 milyon tonniliq kömür kan échish kélishimi imzalighan.

Uning weyran bolushi mezkur kélishimge qandaq tesir körsitidu, bu melum emes. Amérika axbaratlirining xewer qilishiche, pibadiyning weyran bolushigha néfit bazirining kömür bahasigha tesir qilishi, amérikining qattiq muhit ölchimi, xitay iqtisadiy tereqqiyat sür'itining astilap kétishi qatarliq amillar tesir qilghan. Netijide, qimmiti 11 milyard dollarliq mal-mülki qalghan bu shirket, özining 10 milyard 100 milyon dollar qerzini tölelmes ehwalgha chüshüp qalghan.

Pibadiyning 2011‏-yili 15‏-iyul küni Uyghur aptonom rayoni hökümiti bilen tüzgen kélishimi Uyghur rayonida yilliq ishlepchiqirish miqdari 50 milyon tonniliq üsti ochuq kömür kéni échish pilanigha munasiwetlik idi.

Ürümchide ötküzülgen murasimda pibadiyning prézidénti greg boys nutuq sözlep: "Bizning shérikchilikimiz bilim, maharet, meshiq we bixeterlik tejribimizni shinjangdiki shériklirimizge ögitishke imkaniyet yaritip béridu. Bu uning pütkül shinjangdiki kömürkanlargha tarqilishining bashlinishi bolup qalidu" dégen.

Uyghur aptonom rayonluq partkom sékrétari jang chünshyen: "Shinjang hökümitining alahide siyaset chiqirip, kélishimning emeliylishishini qollaydighanliqi" ni bildürgen. Bu kélishim jang chünshyen 2011‏-yili 6‏-ayda amérikini ziyaret qilip qaytip kelgendin kéyinla imzalan'ghan idi.

Toluq bet