Amérikaning mekénzi shirkiti xitaydiki 500 dek xizmetchisini qisqartqan

Amérikaning dangliq yer shari istratégiye we bashqurush mulazimi shirkiti bolghan mekénzi, özining xitaydiki besh yüzdek xizmetchisini qisqartqan. Bu, mekénzining xitaydiki omumi xizmetchisining 3 tin bir qismini teshkil qilidiken.

Mekénzi shirkiti 2018-yili 12-ayda, xitay hökümitining Uyghurlarni keng kölemlik basturushi eng uchigha chiqqan bir peytte, qeshqer etrapida heshemetlik sorun uyushturup, gherb taratqulirining diqqitini qozghighan. Eyni waqitta, “Nyu-york waqti” géziti mekénzi sorun tüzgen jayning bir qanche kilométir nérisida bir jaza lagéri barliqini ashkarilighan.

Amérika kéngesh palatasining ikki nopuzluq ezasi bu yil 5-ayda, mekénzining mes'ullirigha yazghan mektupidimu, mekénzining eyni waqitta xitay hökümiti Uyghur we bashqa musulman milletlerge irqiy qirghinchiliq qiliwatqan bir jayda olturush qilghanliqini tenqidligen.

“Wol sitérét zhornili” ning 17-öktebir ashkarilishiche, nöwette xitayda 1500 dek xizmetchisi bolghan mekénzi, ötken yil yil jeryanidimu nechche yüz xizmetchisini qisqartqan iken. Mekénzining xitaydiki xizmetchilirini qisqartish qarari, xitayning yéqinda iqtisadni qutquzush pilani élan qilip, ösümni chüshürüsh, yerlik hökümetlerning qerzni hel qilishigha yardem bérish, istémalchilargha, bolupmu ikki yaki uningdin artuq perzenti bar istémalchilargha qoshumche yardem qilish qatarliq tedbirlerni élan qilghan bolsimu, bu qutquzush pilanining xitay iqtisadidiki heqiqiy mesilini hel qilishi gumanliq dep qariliwatqan bir peytte élan qilin'ghan.

“Washin'gton pochtisi” gézitining bildürüshiche, xitayning iqtisadni qutquzush pilani maxtashqa érishken bolsimu, emma xitay rehberliri xitayning köplep meblegh sélish we éksportqa tayan'ghan iqtisadiy ösüsh sheklini, istémalgha tayan'ghan iqtisadi ösüsh sheklige özgertishte héchqandaq qedem atmighan. Halbuki, “Wol sitérét zhornili” ning xewiride, mekénzining xitaydiki sodisini uning yer shari sodisidin ayrighanliqi we xitayda soda qilishning bixeterlik xewpini azaytqanliqi bildürülgen.