Америка ширкәтлири әмди биңтуән ширкәтлири билән алақисини үзүдикән

Мухбиримиз җәвлан
2020-12-02
Share

"җәнубий хитай әтигәнлик гезити" ториниң 2-декабир хәвәр қилишичә, америка малийә министирлиқиниң хитайниң биңтуән тәвәликидики ширкәтлиригә кәң-көләмлик җаза йүргүзүшни кечиктүрүш муддити аяғлашқан. Ақсарайдики бир әмәлдарниң билдүрүшичә, америка дөләт мәҗлиси нөвәттики җиддий вәзийәттиму "уйғурларға мунасивәтлик мәҗбурий әмгәкниң алдини елиш қанун лайиһәси" ни оттуриға қоюши мумкин икән.

Хәвәрдә билдүрүлүшичә, биңтуәнниң һәрбий санаәт түсини алған карханилири уйғур районидики пахта содисиниң 17 пирсәнтини контрол қилидикән. 7-Айниң 31-күни америка малийә министирлиқи чәт әл мәблиғини контрол қилиш ишханиси "магнетиски қануни" ға асасән уйғур районидики аз санлиқ милләтләрниң кишилик һоқуқиға еғир дәриҗидә зиянкәшлик қилғучиларға четишлиқ шәхсләрни җазалиғанда, биңтуән әмәлдарлириниму җазалиған. Чүнки биңтуән даирилири вә ширкәтлири уйғур вә башқа мусулман милләтләрни мәҗбурий әмгәккә салған. Америка малийә министирлиқи америка ширкәтлирини бу йил 9-айниң 30-күнидин бурун биңтуән ширкәтлири билән алақисини үзүшни тәләп қилған болуп, арилиқта бу муддәтни йәнә икки ай узатқан. Бу муддәт тошқанда бир қисим ширкәтләр вақитни йәнә узартип беришни тәләп қилған. Чүнки биңтуән билән алақә қилмай туруп, уйғур районидин чиқидиған пахта вә тоқумичилиқ мәһсулатлирини сетивалғили болмайдикән.

Американиң уйғур райониға мунасивәтлик сиясәтлиридин хәвири бар бир әмәлдарниң ейтишичә, америка малийә министирлиқиниң биңтуәнгә җаза йүргүшни кечиктүрүш муддитиниң аяғлишишиға әгишип, мәзкур министирлиқ тапшурувалған муддәтни узартиш тәләплири наһайити азлиған. Биңтуәнниң содиси 147 дөләткә кеңәйгән болуп, уйғур вә башқа милләтләрни қул қилиш бәдилигә кәлгән бундақ йәр шари характерлик сода кеңәймчилики америка малийә министирлиқини биңтуәнни җазалашқа елип барған, әгәр бу җаза йүргүзлүп қалса тарихтики әң зор көләмлик җаза болидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт