Amérika shirketliri emdi bingtu'en shirketliri bilen alaqisini üzüdiken

Muxbirimiz jewlan
2020-12-02
Share

"Jenubiy xitay etigenlik géziti" torining 2-dékabir xewer qilishiche, amérika maliye ministirliqining xitayning bingtu'en tewelikidiki shirketlirige keng-kölemlik jaza yürgüzüshni kéchiktürüsh mudditi ayaghlashqan. Aqsaraydiki bir emeldarning bildürüshiche, amérika dölet mejlisi nöwettiki jiddiy weziyettimu "Uyghurlargha munasiwetlik mejburiy emgekning aldini élish qanun layihesi" ni otturigha qoyushi mumkin iken.

Xewerde bildürülüshiche, bingtu'enning herbiy sana'et tüsini alghan karxaniliri Uyghur rayonidiki paxta sodisining 17 pirsentini kontrol qilidiken. 7-Ayning 31-küni amérika maliye ministirliqi chet el meblighini kontrol qilish ishxanisi "Magnétiski qanuni" gha asasen Uyghur rayonidiki az sanliq milletlerning kishilik hoquqigha éghir derijide ziyankeshlik qilghuchilargha chétishliq shexslerni jazalighanda, bingtu'en emeldarlirinimu jazalighan. Chünki bingtu'en da'iriliri we shirketliri Uyghur we bashqa musulman milletlerni mejburiy emgekke salghan. Amérika maliye ministirliqi amérika shirketlirini bu yil 9-ayning 30-künidin burun bingtu'en shirketliri bilen alaqisini üzüshni telep qilghan bolup, ariliqta bu muddetni yene ikki ay uzatqan. Bu muddet toshqanda bir qisim shirketler waqitni yene uzartip bérishni telep qilghan. Chünki bingtu'en bilen alaqe qilmay turup, Uyghur rayonidin chiqidighan paxta we toqumichiliq mehsulatlirini sétiwalghili bolmaydiken.

Amérikaning Uyghur rayonigha munasiwetlik siyasetliridin xewiri bar bir emeldarning éytishiche, amérika maliye ministirliqining bingtu'en'ge jaza yürgüshni kéchiktürüsh mudditining ayaghlishishigha egiship, mezkur ministirliq tapshuruwalghan muddetni uzartish telepliri nahayiti azlighan. Bingtu'enning sodisi 147 döletke kéngeygen bolup, Uyghur we bashqa milletlerni qul qilish bedilige kelgen bundaq yer shari xaraktérlik soda kéngeymchiliki amérika maliye ministirliqini bingtu'enni jazalashqa élip barghan, eger bu jaza yürgüzlüp qalsa tarixtiki eng zor kölemlik jaza bolidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet