Amérika intil shirkitining diréktori Uyghur mejburiy emgikini tenqid qilishtin özini qachurghan

Amérika kéngesh palatasi tarmaq komitétining ötken hepte ötküzülgen guwahliq yighinida, amérika intil shirkitining soda ishlirigha mes'ul bash emeldari jéf rétinér Uyghur mejburiy emgikini tenqid qilishtin özini qachurghan.

Bu intil shirkitining 2021-yili xitaydiki teminligüchi shirketlirige xet yézip, bu shirketlerning Uyghur mejburiy emgikidin xali turushni telep qilishidin, arqidinla bu xet seweblik xitaydin kechürüm sorishidin béri, tunji qétim Uyghurlar heqqidiki so'algha duch kélishidur. Melum bolushiche, jéf rétinér guwahliq yighinida özining pikir bildürüshi üchün Uyghur mejburiy emgiki heqqide mutexessis emeslikini éytqan. Jéf rétinér bu sözlerni amérika kéngesh palatasi ana weten xewpsizliki we hökümet ishliri tarmaq komitétining guwahliq yighinida, palata ezasi josh xowléyning Uyghurlar heqtiki so'aligha jawab bergende tekitligen.

Yighinda kéngesh palata ezasi josh xowléy “Sizning shinjangdiki mal teminligüchiliringizning Uyghur mejburiy emgiki bilen bolghan munasiwiti qandaq” dep sorighanidi.

“Nyu-york waqti” gézitining eyni waqitta xewer qilishiche, intil shirkiti 2021-yili 11-ayda xitaydiki mal teminligüchi shirketlirige xet yézip, Uyghur mejburiy emgikidin xali turushni telep qilishining arqisidin ijtima'iy alaqe supilirida bayanat élan qilip, bu telepning peqet amérika qanunlirighila qaritilghanliqini bildürgenidi. Yighinda josh xowléy, jéf rétinérdin “Bügün siz xitayning Uyghurlarni éksplatatsiye qiliwatqanliqigha pikir bildürüshni xalimaysiz, shundaqmu?” dégen so'alni sorighanda, rétinér: “Men bu so'alning jawabini mutexessislerge qaldurup qoymaqchi” dégen. Jéf rétinérning körsitishiche, u Uyghurlarni bilsimu, emma xitay da'irilirining Uyghurlargha qiliwatqanlirini xata déyishi üchün “Mutexessis emes” iken. Josh xowléy bolsa jéf rétinérning sözige ishinelmey qalghanliqini bildürüp: “Kishini heyran qaldurghini, sizning shirkitingizmu buninggha oxshash qilghanidi” dep körsetken.