Микрософт өзиниң, хитай ширкитиниң уйғур районидики тәқибләш программисиға ярдәм қилғанлиқини рәт қилған

Мухбиримиз әркин
2019-03-15
Share

Американиң даңлиқ юмшақ детал ширкити‏-микрософт шенҗендики бир хитай ширкитиниң уйғур районидики дигитал (рәқәмлик) тәқибләш программисиға ярдәм қилғанлиқи, бу ширкәт билән һәмкарлиқ мунасивити барлиқини рәт қилған.

Йеқинда голландийәлик бир тор бихәтәрлик тәтқиқатчиси шенҗендики "шинваң упуқ технологийә һәссидарлиқ ширкити" намлиқ карханиниң уйғур аптоном районида 2 йерим милйон кишигә дигитал тәқибләш елип баридиғанлиқини байқап, буни дуняға ашкарилиған. Бу вәқә дуняда наһайити зор ғулғула қозғап, кишилик һоқуқ тәшкилатлириниң һушярлиқини қозғиған иди.

Бәзи хәвәрләрдә, бу ширкәтниң микрософт билән һәмкарлиқ мунасивити барлиқи, униң йүз тонуш юмтали ясашта микрософтниң бәзи юмталлирини ишләткәнлики илгири сүрүлгән иди. Лекин, америкадики CNBC телевизийә қанилиниң хәвәр қилишичә, микрософтниң баянатчиси җүмә күни CNBC ға "микрософтниң шинваң упуқ технологийә ширкити билән һечқандақ һәмкарлиқ мунасивити йоқ. Лекин биз шинваң упуқ технологийәсиниң бизниң ширкәтниң бәлгисини рухсәтсиз ишләткәнликидин хәвиримиз бар. Биз униңдин бизниң бәлгимизни еливетишни тәләп қилдуқ" дегән.

CNBC Ниң хәвиридә билдүрүлүшичә, микрософт баянат елан қилишниң алдида голландийәлик тор бихәтәрлик тәтқиқатчиси виктор геверс шинваң технилогийә ширкитиниң юмталиниң кодини рәсимгә тартивелип, тветирға қойған. У, микрософт ширкитини шинваң упуқ технологийәсиниң пайдилинишиға көз юмуш билән әйиблигән.

Хитайниң ғәрб техникасини қоллинип уйғурларни тәқиб қилиши америка дөләт мәҗлиси әзалири вә хәлқара кишилик һоқуқ тәшкилатлири әң диққәт қилидиған мәсилигә айланған.

Йеқинда америка дөләт мәҗлисиниң бәзи әзалири бу әһвални чәкләш һәққидә қанун тәклип лайиһәси сунған. Дөләт мәҗлиси вә хәлқара кишилик һоқуқ тәшкилатлириниң бесимида америкидики термо-фепир био-техника ширкити уйғур аптоном райониға био-техника әсваблирини сетишни тохтатқанлиқини билдүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт