Mikrosoft özining, xitay shirkitining Uyghur rayonidiki teqiblesh programmisigha yardem qilghanliqini ret qilghan

Muxbirimiz erkin
2019-03-15
Élxet
Pikir
Share
Print

Amérikaning dangliq yumshaq détal shirkiti‏-mikrosoft shénjéndiki bir xitay shirkitining Uyghur rayonidiki digital (reqemlik) teqiblesh programmisigha yardem qilghanliqi, bu shirket bilen hemkarliq munasiwiti barliqini ret qilghan.

Yéqinda gollandiyelik bir tor bixeterlik tetqiqatchisi shénjéndiki "Shinwang upuq téxnologiye hessidarliq shirkiti" namliq karxanining Uyghur aptonom rayonida 2 yérim milyon kishige digital teqiblesh élip baridighanliqini bayqap, buni dunyagha ashkarilighan. Bu weqe dunyada nahayiti zor ghulghula qozghap, kishilik hoquq teshkilatlirining hushyarliqini qozghighan idi.

Bezi xewerlerde, bu shirketning mikrosoft bilen hemkarliq munasiwiti barliqi, uning yüz tonush yumtali yasashta mikrosoftning bezi yumtallirini ishletkenliki ilgiri sürülgen idi. Lékin, amérikadiki CNBC téléwiziye qanilining xewer qilishiche, mikrosoftning bayanatchisi jüme küni CNBC gha "Mikrosoftning shinwang upuq téxnologiye shirkiti bilen héchqandaq hemkarliq munasiwiti yoq. Lékin biz shinwang upuq téxnologiyesining bizning shirketning belgisini ruxsetsiz ishletkenlikidin xewirimiz bar. Biz uningdin bizning belgimizni éliwétishni telep qilduq" dégen.

CNBC Ning xewiride bildürülüshiche, mikrosoft bayanat élan qilishning aldida gollandiyelik tor bixeterlik tetqiqatchisi wiktor géwérs shinwang téxnilogiye shirkitining yumtalining kodini resimge tartiwélip, twétirgha qoyghan. U, mikrosoft shirkitini shinwang upuq téxnologiyesining paydilinishigha köz yumush bilen eyibligen.

Xitayning gherb téxnikasini qollinip Uyghurlarni teqib qilishi amérika dölet mejlisi ezaliri we xelq'ara kishilik hoquq teshkilatliri eng diqqet qilidighan mesilige aylan'ghan.

Yéqinda amérika dölet mejlisining bezi ezaliri bu ehwalni cheklesh heqqide qanun teklip layihesi sun'ghan. Dölet mejlisi we xelq'ara kishilik hoquq teshkilatlirining bésimida amérikidiki térmo-fépir bi'o-téxnika shirkiti Uyghur aptonom rayonigha bi'o-téxnika eswablirini sétishni toxtatqanliqini bildürgen idi.

Toluq bet