Америка-хитай сода келишиминиң иҗра қилиниш әһвалини баһалаш сөһбити кечиктүрүлгән

Мухбиримиз әркин
2020-08-17
Елхәт
Пикир
Share
Принт

Бу йил 2-айда имзаланған америка-хитай 1-басқучлуқ сода келишиминиң иҗра қилиниш әһвалини баһалаш сөһбити кечиктүрүлгән.

Ройтерс агентлиқиниң хәвәр қилишичә, вәқәдин хәвәрдар затлар әсли 15-авғуст күни өткүзүлидиған сөһбәтниң кечиктүрүлгәнлики, америка сода министири лайтхайзер вә малийә министири мнучин билән хитайниң муавин баш министири лю хе оттурисида өткүзүлидиған йеңи сөһбәт вақтиниң техи бекитилмигәнликини билдүргән.

Америка билән хитай бу йил 2-айниң 15-күни 1-басқучлуқ сода келишими имзалап, һәр 6 айда бир қетим келишимниң иҗра қилиниш әһвалини баһалашни қарар қилған. Келишимдә хитай америкадин зор миқдарда йеза-игилик вә енергийә мәһсулатлирини сетивелишқа мақул болған иди. Ройтерс агентлиқиниң хәвиридә тәкитлинишичә, вәқәдин хәвәрдар затлар сөһбәтниң вақит җәдвилидики ихтилап вә хитайниң америка мәһсулатлирини техиму көп сетивелишиға вақит бериш мәқситидә кечиктүрүлгәнликини илгири сүргән.

Хитай 1-басқучлуқ сода келишимидә америкадин қошумчә 200 милярд долларлиқ мәһсулат сетивелишни вәдә қилған. Лекин корона вируси сәвәблик сетивелиш бир мәзгил тәсиргә учриған иди. Мәлум болушичә, хитай йеқинқи бир қанчә һәптә ичидә америка йеза-игилик вә енергийә мәһсулатлирини сетивелишни күчәйткән. Трамп һөкүмитидики әмәлдарлар йеқинқи сетивелишлардин мәмнун икәнлики, сода келишимидин ваз кечиш пилани йоқлуқини билдүргән.

Пикирләр (0)
Share
Толуқ бәт