Amérika hökümiti Uyghur diyarigha da'ir soda körsetmisining qoshumchisini élan qildi

Washin'gtondin muxbirimiz eziz teyyarlidi
2023.09.27

26-Séntebir küni amérika tashqi ishlar ministirliqining tor bétide élan qilin'ghan uqturushta éytilishiche, ular amérika maliye ministirliqi, soda ministirliqi, ana weten bixeterlik ministirliqi, emgek ministirliqi we amérika soda wekiller ishxanisi bilen birlikte 2021-yili élan qilin'ghan “Shinjang teminlesh zenjiri heqqidiki soda körsetmisi” ge qoshumche qilin'ghan mezmunlarni élan qilghan. Uqturushta éniq qilip, “Xitay xelq jumhuriyitining izchil türde shinjang rayonida dawam qiliwatqan qirghinchiliq we insaniyetke qarshi jinayetler, shuningdek keng ewj éliwatqan mejburiy emgekke qarita hoshyarliqni ashurush üchün, bu qoshumche mezmunlar tüzüp chiqildi” déyilgen.

“Qoshumche” de bayan qilinishiche, hökümet we gheyriy hökümet menbeliri Uyghur diyarigha baghlinishliq teminlesh zenjirliride dawam qiliwatqan hemde barghanséri kéngiyiwatqan mejburiy emgek amillirini, shuningdek kishilik hoquq depsendichiliklirini körsitip bergen. Shuning bilen birge, türlük soda yolliri arqiliq xitay bilen soda qilmaqchi bolghan shirketlerning mushu körsetmining yéngilan'ghan nusxisini paydilinish körsetküchi qilish, soda ishlirida tégishlik tekshürüsh charilirini qollinish, shundaqla “Uyghur mejburiy emgikining aldini élish qanuni” boyiche ish körüsh tewsiye qilin'ghan.

Mezkur “Qoshumche” de yene Uyghur diyaridiki mejburiy emgekni xitay hökümet sistémisining bir qolluq himaye qilish we teshkillesh hadisisini körsitip ötülgen bolup, “Shinjangdiki xitay shirketliri bilen soda qilmaqchi yaki ulargha meblegh salmaqchi bolghanlar, banka we maliye organliri üchünmu bu qollanma ortaqtur” déyilgen. Shuning bilen birge herqaysi ministirliqlarning, b d t élan qilghan soda we kishilik hoquq heqqidiki körsetmilerningmu birdek bu xil qilmishlarni men'i qilidighanliqi eskertilgen.

Mezkur “Körsetme” ning toluq tékisti torgha qoyulghan bolup, erebche, xitayche we rusche qatarliq alte xil tilgha terjime qilin'ghan. Gerche bu “Körsetme” mejburiy yosunda ijra qilinidighan qanun maddiliri bolmisimu, soda sahesige nöwette Uyghur diyarida némilerning boluwatqanliqi, shuningdek ularning qandaq kishiler bilen soda qilidighanliqi heqqide uchur bergüchi eng nopuzluq melumat hésablinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.