Donald trampining sey yingwén bilen ötküzgen söhbiti inkas qozghidi

Muxbirimiz ümidwar
2016-12-05
Élxet
Pikir
Share
Print


Amérika qoshma shtalirining yéngidin saylan'ghan prézidénti donald tramp jüme küni teywen prézidéni sey yingwén bilen téléfonda sözleshken bolup, ikkeylen arisidiki söhbet 10 minuttin ashqan,

Amérika awazining xewer qilishiche, donald trampning sey yingwén bilen élip barghan téléfon söhbiti amérika-teywen munasiwet tarixidiki yéqinqi on nechche yildin buyanqi bir yéngiliq bolup, bu,1979-yilidin buyan teywen prézidéntining tunji qétim amérikining yéngidin saylan'ghan prézidénti bilen téléfon söhbiti élip bérishi iken.

Donald tramp bilen démokratik ilgharliq partiyisidin kélip chiqqan teywen prézidénti sey yingwénning téléfon söhbiti teywen, chong quruqluq we amérika metbu'atlirida türlük inkaslarni otturigha chiqardi.

Shenbe küni xitay tashqi ishlar ministirlikining bayanatchisi inkas bildürüp, xitay terepning bu ish heqqide amérikining munasiwetlik tereplirige qattiq naraziliq inkas bildürgenlikini éytqan.

Shu küni xitay tashqi ishlar ministiri wang yimu metbu'atlargha inkas bildürüp, bu ishni teywen terepning "Kichik herikiti" dep atighan hemde uning xelqara jem'iyette shekillinip bolun'ghan bir junggo weziyitini özgertelmeydighanliqini eskertken.

Sey yingwén bilen donald trampning söhbiti amérika metbu'atliriningmu inkaslirini qozghighan bolup, "Washin'gton pochtisi"gézitidiki bir maqalide éytilishiche, tramp bilen sey yingwénning téléfon söhbiti diplomatiye tertipini buzup tashlighan bolup, bu, buningdin kéyinki amérika-xitay munasiwetlirige tesir körsitidu.

Melumki, donald tramp saylam jeryanidiki sözliride amérika-xitay soda-iqtisadiy munasiwetliri heqqide toxtalghanda xitayni köp qétim tenqid qilghan idi.

Toluq bet