Американиң йеңи импорт бәлгилимиси қирғинчилиққа чәк қоймақчи

Мухбиримиз әзиз
2020-12-08
Share

Америка таможна вә чегра мудапиә идариси өткән һәптә хитайдин импорт қилинидиған барлиқ пахта мәһсулатлирини мәни қилиш буйруқи елан қилғандин кейин буниң уйғурларни нишан қилған қирғинчилиқни чәкләштә актип рол ойниши үмид қилинишқа башлиди. Тәтқиқатчилардин лавра мурфий вә раян сам имзасида "вашингтон почтиси" гезитиниң 7-декабир санида елан қилинған баш мақалида мушу мәсилә шәрһилиниду.

Апторларниң қаришичә, уйғур дияридики "шинҗаң ишләпчиқириш-қурулуш биңтуәни" йерим аптономийә шәклини алған һалда ғайәт зор пахта базисини маңдуруватқан болуп, америка базиридики пахта мәһсулатлири вә пәмидур мәһсулатлириниң көп қисми мушу җайдин келидикән. Биңтуәнниң қармиқида 14 кархана гуруһи вә төт миңдин артуқ ширкәт бар икән. Йәнә келип биңтуәнләр хитай көчмәнлирини уйғур дияриға йәрләштүрүш һәмдә лагерлар қурулушини кеңәйтиштики актип васитиләр икән. Биңтуәнниң ғайәт зор көләмдики территорийә вә байлиқни контрол қилиши йәнә бир яқтин хитай һөкүмитиниң уйғурларни мәҗбурий ассимилятсийә қилишида бәкму муһим рол ойнайдикән. Шуңа америка һөкүмитиниң биңтуәндин келиватқан пахта мәһсулатлирини мәни қилиши маһийәттә нөвәттики уйғурларни асас қилған мәҗбурий әмгәкни чәкләштә бәкму муһим қиммәткә игә икән.

Мақалида көрситилишичә, бу қетимқи импорт чәклимиси таҗсиман вируси һәмдә хәлқараниң мәҗбурий әмгәк һәққидики әйибләшлири түпәйлидин хитайдин қошна дөләтләргә көчүрүлүватқан завутларниң көпийишини техиму юқири пәллигә чиқириши мумкин икән. Әмма буниң уйғур дияридики кишиләргә нисбәтән әкс тәсири йоқ икән. Чүнки хитай һөкүмити давамлаштуруватқан мәҗбурий әмгәктә ялғуз иқтисадий мәнпәәтла көзләнгән болмастин, йәнә бу арқилиқ мәдәнийәт қирғинчилиқи әмәлгә ашурулмақтикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт