Amérikining tamozhna béjini yuqirilitish éhtimaligha qarshi, xitayda “Xelq puli” ning kursini chüshürüsh muzakire qilin'ghan
2024.12.11
“Roytérs agéntliqi” ning 12-ayning 11-künidiki xewirige asaslan'ghanda, amérikining tamozhna béjini yuqirilitishidin ensirigen xitay hökümiti, xitay pulining kursini (dollar qarshisidiki qimmitini) chüshürüshni muzakire qilghan. Bu arqiliq xitay hökümiti éksportni köpeytip, trampning ikkinchi pirézidéntliq mezgilide otturigha chiqish éhtimali bolghan soda xewpini azaytishni meqset qilghan.
Donald tramp aldinqi nöwetlik pirézidéntliq mezgilide xitaygha qarshi soda urushining piltisini yéqip, xitayning éksport mehsulatlirigha nechche yüz milyard dollarliq tamozhna béji qoyghan, shundaqla xitayning eng chong uchur-alaqe téxnika shirkiti bolghan xu'awéyni cheklesh herikiti bashlatqanidi. Tramp ikkinchi qétim pirézidéntliq wezipisige olturushtin burun, xitay malliridin kem dégende 60 pirsent tamozhna béji élishqa wede qilip kelmekte.
“Roytérs agéntliqi” ning iqtisadshunaslar arisida élip barghan ray sinash netijiside körsitilishiche, amérika kéler yilining béshida xitaydin import qilinidighan mallargha %40 ke yéqin tamozhna béji élishi, buning netijiside dunyada ikkinchi chong iqtisadiy gewde hésablan'ghan xitay iqtisadining éshishi 1 pirsent töwenlishi mumkin iken.
Xitay hökümiti yéqinda, xitay iqtisadi we donald trampning yéngi soda urushini otturigha chiqirish éhtimaligha qarita yéngi qarar maqullighan, xitaydiki yerlik hökümetlerning ghayet zor qerzni tölishige yardem bérish üchün, 1 tirilliyon 400 milyard dollarliq iqtisadni righbetlendürüsh pirogrammisini jakarlighanidi.
Halbuki, doktor andérs kor qatarliq analizchilar xitayda bir yürüsh iqtisadiy mesililerni hel qilish üchün meblegh sélishni östürüsh emes, eksiche bazar we iqtisadiy qurulma islahati élip bérishi kéreklikini ilgiri sürmekte.