Amérika tamozhnisida tutup qélin'ghan dangliq aptomobillargha xitayda ishlen'gen zapchaslar seweb bolghan

Washin'gtondin muxbirimiz jewlan teyyarlidi
2024.02.15

En'gliye “Pul-mu'amile waqti” torining 14-féwral küni bergen xewirige qarighanda, porchi (Porsche) , béntli (Bentley) , awdi (Audi) qatarliq dangliq we qimmet aptomobillargha ishlitilgen zapchaslar xitaydin import qilin'ghanliqi üchün, bu markidiki minglighan aptomobillar amérika tamozhnisida tutup qélin'ghan.

Xewerde éytilishiche, yuqiriqi aptomobillar gérmaniyening aptomobil shirkiti wolkiswagén teripidin yasalghan bolup, uninggha ishlitilgen éléktironluq zapchaslar xitaydiki mejburiy emgek bilen chétishliq iken. Bu zapchaslarni wolkiswagén biwasite sétiwalghan bolmastin, teminlesh zenjiridiki xitay zawutliri sétip bergeniken.

Shuning bilen bir waqitta, gérmaniyediki taratqular Uyghur rayonidiki mejburiy emgektin payda éliwatqan wolkiswagén heqqide téximu köp uchurlarni ashkarilawatqan bolup, bular mezkur shirketning tijaritige zerbe bermekte iken.

En'gliye “Intérnét xewerliri” torining buninggha munasiwetlik bir xewiride éytilishiche, wolkiswagén yuqiriqi ehwalgha inkas qayturup, her qandaq mashina zapchaslirigha mejburiy emgek amillirining ariliship qélishigha yol qoymighanliqini bildürgen. Halbuki, wolkiswagén 2019-yil ürümchide tarmaq zawutini qurghandin bashlap Uyghur mejburiy emgiki bilen chétishliqi bar dep qarilip kelgen. Bu zawutning 3 yilliq qurulushigha Uyghur ishchilirining ishlitilgenliki gérmaniye “Soda géziti” teripidin ashkarilan'ghan. Yéqinda ashkarilan'ghan bir xewerde, wolkiswagénning mashina sinaq qilish meydanining yasilishigha Uyghur mejburiy emgikining ishlitilgenliki melum bolghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.