Amérika xitaydin kirgen 4000 din artuq kompyutérni mejburiy emgekke chétishliq dep tutup qalghan

Muxbirimiz irade
2020-08-06
Share

Amérika chégra da'iriliri xitaydin kirgüzülgen 4000 din artuq tiz kompyutérini (Laptop) Uyghur élidiki mejburiy emgekke chétishliq, dep tutup qalghan.

Amérikaning "ABC" téléwiziyesining bu heqtiki xewiridin qarighanda, amérikaning alabama shtatidiki mektepler üchün zakaz qilin'ghan bu tiz kompyutérigha qurashturulghan parchilar xitayning "Xéféy bitland uchur téxnika cheklik shirkiti" teripidin ishlep chiqirilghan bolup, bu del amérika hökümiti teripidin Uyghurlarning qul emgikige sélinishigha chétishliq dep jazalan'ghan xitay shirkiti we mu'essesilerning biri.

Mektepning mudiri alan kosbining ABC xewerlirige éytishiche, alabama shtatining étowa rayonidiki mektepler bu yil küz pesillik oqu-oqutush xizmetlirining tor arqiliq élip bérilishi üchün téxnikiliq yardemni üstige alghan "Trinity3 Technology" shirkiti arqiliq bu tiz kompyutérlirini sétiwalghan. Amérika chégra da'iriliri mektep da'irilirige bu kompyutérlarning tutup qélin'ghanliqini bildürgendin kéyin ular zakazni emeldin qaldurup, bashqa shirket arqiliq yéngi bir türküm kompyutérlarni zakaz qilghan.

Amérika hökümiti Uyghurlarning Uyghur éli we xitay ölkiliridiki zawutlarda mejburiy emgekchilerge aylandurulush mesilisige diqqet qiliwatqan bolup, u ötken öktebirde we bu yil 7-ayda ayrim-ayrim halda 28 we 11 xitay shirket we mu'essesini Uyghurlarni qul emgikige sélishqa chétishliq bolghanliqi üchün qara tizimlikke alghan we herqandaq amérika shirkiti we organlirining ular bilen tijaret qilishini chekligenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet