Amérika tashqi ishlar ministirliqining yéngilan'ghan bayannamisige soda, kishilik hoquq we mejburiy emgek mesilisi kirgüzülgen

Amérika tashqi ishlar ministirliqi hökümetning nöwettiki xitay siyasitige we eng bashta köngül bölidighan mesililirige qarita özgertish kirgüzgenlikini bildürgen bolup, uningda soda, kishilik hoquq we mejburiy emgek mesilisi tilgha élin'ghan.

20-Féwral, “Roytérs agéntliqi” ning bu heqte bergen xewiride déyilishiche, amérika tashqi ishlar ministirliqi 13-féwral xitaygha qaratqan siyasiti heqqidiki bayannamisige özgertish kirgüzgen. Uningda yéngi hökümetning xitay bilen bolghan soda we bashqa muhim mesililerge alahide köngül bölidighanliqi ipadilen'gen. Mesilen uningda, xitay iqtisadi “Dunya boyiche eng éghir cheklimige tolghan meblegh sélish muhitliridin biri” dep körsitilgen, xitay bilen sodidiki tengpungsizliq alahide tekitlen'gen, amérika shirketlirining xitaydiki tijaritining endishe peyda qilidighanliqi bildürülgen. Bayannamide mundaq déyilgen: “Xitay ezeldin adil soda qilmaydu. Xitay shirketliri mejburiy emgek we döletning zor miqdardiki toluqlima yardimidin behrimen bolghini üchün, amérika shirketlirini paydisiz ehwalda qoyidu, shundaqla ularni kishilik hoquqni depsende qilishqa shérik qilidu”. Bayannamide yene, xitay bilen dostane hemkarliq ornitish, xitayning medeniyet we muhit mesililirige yardem bérish heqqidiki gepler chiqiriwétilgen.

Buningdin ilgiri, amérika tashqi ishlar ministirliqining xitay siyasiti heqqidiki bayannamiside, “Amérika teywenning musteqilliqini qollimaydu” dégen jümlining chiqiriwétilgenliki melum bolghanidi.

Amérika tashqi ishlar ministirliqi bayanatchisining bildürüshiche, yéngilan'ghan bu bayanname tramp hökümitining xitay bilen bolghan munasiwitining yol xeritisini, jümlidin hökümet eng bashta köngül bölidighan mesililerni körsitip béridiken.

Xitay tashqi ishlar ministirliqi bayanatchisi uninggha inkas bildürüp: “Bu, pakitni burmilap, xitayning tashqi siyasitige töhmet qilghanliq, amérika bilen xitayning atalmish istratégiyelik riqabitini dawrang qilghanliq” dégen.

Amérika tashqi ishlar ministirliqining bu yéngilan'ghan bayannamisi pirézidént tramp féntanilning amérikagha kirishini tosush üchün xitaygha on pirsent qoshulma tamozhna béji qoyghan, eger bu kargha kelmise xitaygha yene üstilep tamozhna béji qoymaqchi bolghan bir mezgilge toghra kelgen.