Amérika tashqiy ishlar ministirliqi: "'sherqiy turkistan islam herkiti' ning mewjutluqigha da'ir héchqandaq ishenchilik delil yoq"

Muxbirimiz erkin
2020-11-06
Share

Amérika tashqiy ishlar ministirliqi 6-noyabir küni radiyomizgha yazma bayanat bérip: "Sherqiy turkistan islam herkiti" ning "Térorluq teshkilatlar tizimliki" din chiqiriwétilgenlikige chüshenche berdi. Ularning tekitlishiche, "Sherqiy turkistan islam herkiti" héchqachan amérikaning "Térorluq teshkilatlar tizimliki" ge kirgüzülüp baqmighan bolup, u peqet "Térorluqni yeklesh tizimliki" ge élin'ghan iken. Amérika tashqiy ishlar ministirliqi yuqiriqi bayanatni radiyomiz Uyghur bölümining bu heqtiki so'allirigha jawaben élan qilghan.

Amérikadiki bir fédéral hökümet tori 5-noyabir amérika tashqiy ishlar ministiri mayk pompéyoning  ötken ayda "Sheqiy türkistan islam herkiti" teshkilatini "Térorluq teshkilatlar tizimliki" din öchürüwetkenlikini xewer qilghan. Mayk pompéyo ilgiri "Xitayning shinjangdiki basturushining térorluqqa qarshi turush emesliki", "Xitayning meqsiti musulman puqralirining étiqadi we medeniyitini yoqitish" ikenlikini tekitligen.

Xitay tashqiy ishlar ministirliqi 6-noyabir küni amérikaning bu qararidin "Epsuslan'ghanliqi we uning qararini ret qilidighanliqi" ni bildürgen. Amérika tashqiy ishlar ministirliqining bayanatida "Sherqiy turkistan islam herkiti" ning "Térorluqni yeklesh tizimliki" din öchürüwétilish sewebini chüshendürüp: "'sherqiy turkistan islam herkiti' bu tizimliktin öchürüwétildi. Chünki 10 nechche yildin béri bu teshkilatning izchil mewjutluqigha da'ir ishenchilik delil-ispat yoq. 'sherqiy türkistan islam herkiti' héchqachan chet el térorluq teshkilatliri tizimlikige kirgüzülüp baqmighan," déyilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet