Amérikaning “Biz teywenning musteqilliqini qollimaymiz” dégen geptin waz kéchishi xitayning ghezipini qozghighan

Amérika tashqi ishlar ministirliqi öz tor bétidin “ Amérika teywenning musteqilliqini qollimaydu” dégen jümlini chiqiriwetken bolup, buningdin xitayning oghisi qaynap ketken.

BBC Torining bu heqtiki xewiride déyilishiche, amérika tashqi ishlar ministirliqining amérika-xitay munasiwitige da'ir bayannamiside “Biz teywenning musteqilliqini qollimaymiz؛ teywen bilen emes, xitay bilen resmiy diplomatik munasiwet ornitimiz” dégen jümliler orun alghan bolup, aldinqi hepte “Biz teywenning musteqilliqini qollimaymiz” dégen jümle öchürüp tashlan'ghan. Xitay terep buningdin ghezeplinip, “Bu, teywen bölgünchilirige xata uchur bergenlik” dégen hemde amérikaning bu “Xataliq” ni derhal toghriliwélishini telep qilghan.

Kommunist xitay hökümitining teywenni ezeldin xitayning bir qismi dep qarap kéliwatqanliqi hemde “Wetenni birlikke keltürüsh” üchün qoral küchi ishlitishtinmu yanmaydighanliqini bildürüp kéliwatqanliqi melum.  Teywenlikler bolsa, xitay bilen birleshmeslik hem musteqilliq élan qilmasliq pozitsiyeside bolup kelmekte.

BBC Ning xewiride déyilishiche, amérika tashqi ishlar ministirliqining yéngi bayannamiside “Teywenning musteqilliqini qollimasliq” ibarisi chiqiriwétilgendin bashqa yene, amérikaning muwapiq peyt piship yétilgende teywenning xelq'ara teshkilatlargha kirishini qollaydighanliqi yézilghan. Amérikaning teywendiki elchixanisi rolini ötewatqan amérika teywen jem'iyiti bayanatchisining bildürüshiche, mezkur yéngi bayanname emeliyette amérika bilen teywenning hökümetsiz munasiwitini namayan qilip béridiken. Teywen tashqi ishlar ministiri lin jyalung bolsa amérikaning teywen'ge téximu yéqinliqini ipadileydighan bu ishigha rehmet éytidighanliqini bildürgen.

Xitay tashqi ishlar ministirliqi 17-féwral bu heqte inkas bildürüp, “Amérikaning teywen heqqidiki meydanining éghir derijide chékin'genlikini, teywendin paydilinip xitayni chekleshte jahilliq bilen ching turuwatqanliqi” ni éytqan.